काठमाडौँ । अन्तर्राष्ट्रिय चिकित्सा सहायता समूह डाक्टर्स विदाउट बोर्डर्स (एमएसएफ) का अनुसार, सुडानको ह्वाइट नाइल राज्य मा गएको दुई हप्ताभित्र हैजाका कारण कम्तीमा ९२ जनाको मृत्यु भएको छ। फेब्रुअरी २० देखि मार्च ५ सम्म कोस्ती शिक्षण अस्पतालमा रहेको हैजा उपचार केन्द्रमा २,७१८ जना बिरामी भर्ना भएका छन्।
हैजा, जुन दूषित पानीका कारण फैलिने रोग हो, फेब्रुअरी १६ मा उम-दबाकिर पावर स्टेशनमा ¥यापिड सपोर्ट फोर्सेस (आरएसएफ) द्वारा गराइएको प्रक्षेपणपछि फैलिएको बताइएको छ। उक्त घटनाका कारण ठूलो मात्रामा बिजुली आपूर्ति बन्द भएको थियो।
सुडानी स्वास्थ्य मन्त्रालयका अनुसार जुलाई २०२४ यता देशभर ५७,१३५ हैजा संक्रमित फेला परेका छन्, जसमा १,५०६ जनाले ज्यान गुमाएका छन्।
ह्वाइट नाइल राज्यमा आरएसएफले निरन्तर आक्रमण गर्दै आएको छ। विशेषगरी अल-गिटैना क्षेत्र र वरपरका गाउँहरूमा भएको आक्रमणमा ४३३ नागरिकको ज्यान गएको छ। संयुक्त राष्ट्रसंघले उद्धृत गरेको तथ्याङ्क अनुसार, अप्रिल २०२३ देखि सुडानमा सुडानी सशस्त्र सेना र आरएसएफबीचको द्वन्द्व जारी छ, जसले अहिलेसम्म २९,६८३ जनाको ज्यान लिइसकेको छ।
अन्तर्राष्ट्रिय आप्रवासन सङ्गठनका अनुसार, यो द्वन्द्वका कारण १ करोड ५० लाखभन्दा बढी मानिसहरू विस्थापित भएका छन्, जसले सुडान भित्र र बाहिर दुबै क्षेत्रमा मानवीय संकट निम्त्याएको छ।
