जम्मू–कश्मीरको आतंकवादी हमलामा मारिने बुटवलका न्यौपाने, आमा घाइते
हाम्रा कुरा
प्रकाशित २०८२ वैशाख १० बुधबार
1.2k
Shares
काठमाडौँ । भारतको जम्मू–कश्मीरमा मंगलबार दिउँसो भएको आतंकवादी हमलामा परी मृत्यु भएका नेपालीको पहिचान खुलेको छ। आतंकवादी हमलामा २७ जना पर्यटकको मृत्यु हुँदा एक जना नेपाली सुदीप न्यौपाने पनि भएको खुलेको हो ।
परराष्ट्र मन्त्री डा आरजू राणा देउवाले पाहलगममा आतङ्ककारी हमलामा परी नेपाली नागरिक वुटवल–१४ बेलभरिया रुपन्देहीका सुदीप न्यौपानेको निधन भएको जानकारी दिएकी हुन् ।
मृतक बुटवल उपमहानगरपालिका वडावन-१४ बेलभरियाका सुदीप न्यौपाने भएको मृतकका नातेदार कपिल न्यौपानेले बताएको बुटवलबाट सहकर्मी नारायण वलीले जनाएका छन् ।
उनी चार दिन अघि आमा, बहिनी र बहिनी ज्वाइँसहित घुम्न गएको बताइएको छ । यतिबेला परिवारलगायत बेलभरिया शोकमा डुबेको छ ।
‘‘सुदीप न्यौपानेको निधन भएको खबरले निकै मर्माहत भएकी छु । उहाँप्रति हार्दिक श्रद्धाञ्जली अर्पण गर्दै परिवारजनमा गहिरो समवेदना व्यक्त गर्दछु’ परराष्ट्र मन्त्री राणाले भनेकी छिन् ।
साथै सो आतङ्ककारी हमलामा परेर न्यौपानेकी आमा घाइते भएकी छिन् । उनको शीघ्र स्वास्थ्यलाभको कामनासमेत राणाले गरेकी छिन् ।
‘उहाँहरु घुमघामका लागि त्यहाँ पुग्नु भएको समाचार पनि प्राप्त भएको छ, यस्तो क्रुर र अमानवीय कार्यको जति निन्दा गरे पनि पुग्दैन,’ उनले लेखेकी छिन्, ‘नेपाल सरकार यो घटनाको निन्दा एवं भत्र्सना गर्दछ र यस दुःखको घडीमा भारत सरकार र भारतीय जनताको साथमा रहेको छ ।’ उनका अनुसार सो घटनाका बारेको थप जानकारीका लागि परराष्ट्र मन्त्रालय सम्पर्कमै रहेको छ ।
अन्य मारिनेमा एक यूएईका र बाँकी सबै भारतीय हुन् । आतंकवादीले अन्धाधुन्ध गोली हानेर मार्नुपूर्व नाम, धर्म सोधिएको थियो ।
