काठमाडौँ । युद्धग्रस्त सुडानमा हैजाको प्रकोप भयावह रूपमा बढेको छ। सुडानको स्वास्थ्य मन्त्रालयले मंगलबार जानकारी गराएअनुसार, पछिल्लो एक सातामा मात्रै दुई हजार ७०० भन्दा बढी व्यक्ति हैजाबाट सङ्क्रमित भएका छन् भने १७२ जनाले ज्यान गुमाएका छन्।
मन्त्रालयले जारी गरेको विज्ञप्तिमा खार्तुम राज्यमा ९० प्रतिशत सङ्क्रमण भेटिएको उल्लेख छ। सन् २०२३ को अप्रिलदेखि सेना र अर्धसैनिक रेपिड सपोर्ट फोर्सेज (आरएसएफ) बीचको द्वन्द्वका कारण पानी र बिजुली आपूर्तिमा गम्भीर अवरोध आएको छ, जसले हैजाको प्रकोपलाई झन् बढावा दिएको छ। देशको दक्षिण, मध्य र उत्तरमा पनि सङ्क्रमण फैलिएको छ।
गरिबीले ग्रस्त सुडानमा हैजाको प्रकोप पहिले पनि देखिने गर्थ्यो, तर युद्ध सुरु भएपछि स्थिति अझ खराब भएको छ। युद्धले पहिलेदेखि नै कमजोर रहेको पानी, सरसफाइ र स्वास्थ्य पूर्वाधारहरूलाई ध्वस्त पारेको छ। डक्टर्स विदाउट बोर्डर्स (एमएसएफ) का अनुसार, द्वन्द्वका कारण बिजुली र स्थानीय पानीको सञ्जाल सेवाबाट वञ्चित भएपछि त्यहाँका बासिन्दा असुरक्षित पानीका स्रोत प्रयोग गर्न बाध्य छन्। खार्तुमस्थित एमएसएफका मेडिकल कोअर्डिनेटर स्लेमेन अम्मरले पानी प्रशोधन केन्द्रहरूमा बिजुली नहुँदा नाइल नदीबाट स्वच्छ पानी उपलब्ध हुन नसकेको बताएका छन्।
गत मंगलबार मन्त्रालयले पछिल्लो तीन हप्तामा २,३०० भन्दा बढी हैजाका बिरामीमध्ये ५१ जनाको मृत्यु भएको जनाएको थियो। आरएसएफले यसै महिना खार्तुममा ड्रोन आक्रमण गरेको थियो, जसबाट तीनवटा विद्युत गृह पनि प्रभावित भएका थिए, यद्यपि गत हप्ता आरएसएफलाई राजधानीबाट पूर्ण रूपमा बाहिर निकालिएको थियो।
विश्व स्वास्थ्य सङ्गठनका अनुसार, सुडानको पहिलेदेखि नै कमजोर स्वास्थ्य सेवा प्रणाली युद्धका कारण 'थप अस्तव्यस्त' अवस्थामा पुगेको छ। चिकित्सक सङ्घका अनुसार, देशका ९० प्रतिशतभन्दा बढी अस्पतालहरू कुनै न कुनै बेला युद्धका कारण बन्द भएका छन्, र स्वास्थ्य संस्थामा पटकपटक आक्रमण, बमबारी तथा लुटपाट हुने गरेकाले स्थिति झन् भयावह बनेको छ।
अहिले तेस्रो वर्षमा प्रवेश गरेको यो युद्धले दशौँ हजारको ज्यान लिइसकेको छ। यस युद्धले एक करोड ३० लाख मानिसलाई विस्थापित गरेको छ, जसले विश्वको सबैभन्दा ठूलो विस्थापन र भोकमरीको सङ्कट निम्त्याएको छ
