पोखरा । तनहुँमा चितुवाको आक्रमणबाट एक बालकको ज्यान गएको छ । मृत्यु हुनेमा छ वर्षीय उत्सव गुरुङ छन् ।
जिल्ला प्रहरी कार्यालय तनहुँका अनुसार बन्दीपुर गाउँपालिका वडा नं २ कुवादीमा सोमबार साँझ करिब ७ः३० बजे उत्सव गुरुङ आफ्नै घरको आँगनमा बसिरहेका बेला चितुवाले आक्रमण गरेको थियो ।
चितुवाको आक्रमणबाट गम्भीर घाइते भएका बालकलाई उपचारका लागि तत्काल बन्दीपुर अस्पताल लगिएकामा चिकित्सकले मृत घोषणा गरेका थिए ।
नरभंक्षी चितुवाको खोजी भइरहे पनि फेला नपरेको जिल्ला प्रहरी कार्यालय तनहुँका सूचना अधिकारी प्रहरी नायब उपरीक्षक अशोक थापाले बताए ।
यो घटनासँगै कुवादीवासी त्रासमा छन् । तनहुँमा चितुवाकै आक्रमणबाट थुप्रै बालकालिकाले ज्यान गुमाएका छन् ।
सम्बन्धित निकायले क्षतिपूर्ति दिनुबाहेक चितुवा नियन्त्रणमा कुनै पहल नगरेको गुनासो पीडित परिवारजनको गुनासो छ ।
