काठमाडौं। नेपाली कांग्रेसका सांसद डा. प्रकाशशरण महतले आर्थिक वर्ष २०८२/८३ को बजेट मुलुकको स्रोत साधनको आधारमा नै विनियोजन भएको बताएका छन्। शनिबार प्रतिनिधि सभा बैठकमा विनियोजन शीर्षकहरूमाथि भएको छलफलमा भाग लिँदै उनले मन्त्रालयहरूमा विनियोजित बजेटको सही उपयोग, सदुपयोगको सम्भावना र प्राथमिकताको आधारमा खर्च भए/नभएको महत्त्वपूर्ण सवाल रहेको टिप्पणी गरे।
कार्यान्वयन र प्राथमिकताको महत्व
डा. महतले सरकारले विनियोजित बजेटको कार्यान्वयनमा जोड दिनुपर्ने बताए। उनले ‘कनिका छरेजसरी’ बजेट छर्ने परम्पराले परिणाम नआउने दाबी गर्दै ठूला र महत्त्वपूर्ण योजनाहरू संघीय सरकारले नै गर्नुपर्नेमा जोड दिए। उनले विकास कसरी गर्नुपर्छ भनेर प्रदेश र स्थानीय तहलाई उदाहरणका रूपमा प्रस्तुत गर्नुपर्ने बताए।
"मूलतः मन्त्रालयगत विनियोजनको कुरा गर्दा यसै पनि हाम्रो बजेटको आकार थोरै छ। देशको साधन स्रोत नै थोरै छ, जुन हिसाबले मन्त्रालयगत विनियोजन हुने नै भयो," डा. महतले भने, "जति साधनस्रोत विनियोजित भएको छ सम्बन्धित मन्त्रालयमा, उपशीर्षकहरूमा कसरी बजेट विनियोजन गरिएको छ, प्राथमिकीकरण गरिएको विनियोजित बजेटको राम्रोसँग उपयोग हुन्छ कि हुँदैन? त्यो नै महत्त्वपूर्ण सवाल हो भन्ने मलाई लाग्छ।"
परराष्ट्र र शिक्षा मन्त्रालयको बजेटमाथि टिप्पणी
डा. महतले परराष्ट्र मन्त्रालयको बजेटमा १५.८ प्रतिशतले वृद्धि भएकोमा यसले कूटनीतिक गतिविधि परिचालनमा मद्दत पुग्ने बताए, तर स्रोत साधन अझै थप्नुपर्ने आवश्यकता औँल्याए।
शिक्षा मन्त्रालयको बजेटबारे टिप्पणी गर्दै उनले राष्ट्रिय बजेट बढेको तुलनामा यो कम भएको बताए। उनले शिक्षा विधेयक पारित भएपछि आर्थिक दायित्व बढ्ने भएकाले विनियोजित बजेट तलबभत्तामा मात्र सीमित हुने कि शिक्षाको गुणस्तर बढाउनका लागि महत्त्वपूर्ण काम गर्न सक्छ भन्नेमा ध्यान दिनुपर्ने बताए।
गृहमन्त्रालय र समग्र बजेट कार्यान्वयन
गृहमन्त्रालयले शान्तिसुरक्षा सुनिश्चित गर्ने कुरामा बजेट खर्च हुने भन्दै उनले नेपाल सरकारले विनियोजित बजेटको कार्यान्वयनतर्फ जोड दिनुपर्ने बताए। छुट्याइएका बजेटको कार्यान्वयन हेरेपछि मात्र त्यस बारेमा थप टिप्पणी गर्न सकिने डा. महतको भनाइ थियो।
