भारतको रणनीतिक र आर्थिक साझेदारीलाई सुदृढ पार्न मोदी जापान भ्रमणमा
हाम्रा कुरा
प्रकाशित २०८२ भदौ १३ शुक्रबार
1.4k
Shares
नयाँदिल्ली । भारतीय प्रधानमन्त्री नरेन्द्र मोदी जापानको दुई दिने भ्रमणमा रहेका छन् । प्रधानमन्त्रीको रूपमा यो उनको जापानको आठौँ भ्रमण हो । उनीभन्दा पहिले मनमोहन सिंहले सबैभन्दा धेरै तीन पटक मात्र जापानको भ्रमण गरेका थिए ।
प्रधानमन्त्री मोदीले जापानमा १५ औं भारत-जापान वार्षिक शिखर सम्मेलनमा भाग लिनेछन् । यस सम्मेलनमा दुई देशहरू बीचको रणनीतिक र आर्थिक साझेदारीलाई सुदृढ पार्ने बारेमा छलफल हुनेछ ।
जापान जानुअघि उनले सामाजिक सञ्जालमा लेखेका थिए, 'यस भ्रमणको क्रममा, भारत र जापान बीचको विशेष रणनीतिक र विश्वव्यापी साझेदारीलाई सुदृढ पार्ने कुरामा ध्यान केन्द्रित गरिनेछ।'
प्रधानमन्त्री मोदीले आज सुरक्षा, रक्षा र व्यापारको बारेमा कुरा गर्नेछन् । प्रधानमन्त्री मोदीले आज वार्षिक सम्मेलनको क्रममा प्रधानमन्त्री इशिबासँग सुरक्षा, रक्षा, व्यापार र प्रविधि जस्ता मुद्दाहरूमा छलफल गर्नेछन् ।
यसपछि दुवैले रात्रिभोज गर्नेछन् । शनिबार मोदीले जापानको मियागीमा रहेको कारखानाको पनि भ्रमण गर्नेछन्, जहाँ बुलेट ट्रेनका कोचहरू बनाइन्छ ।
जापानी मिडियाका अनुसार, यस भ्रमणको क्रममा जापानले भारतमा १० ट्रिलियन येन अर्थात् ५.९३ लाख करोड भारतीय रुपैयाँको लगानी घोषणा गर्ने भएको छ।
अमेरिकी राष्ट्रपति डोनाल्ड ट्रम्पले भारतमा ५० प्रतिशत कर लगाउने निर्णय गरेपछि मोदीको यो भ्रमण भारतको रणनीतिक र आर्थिक साझेदारीलाई सुदृढ पार्ने सन्दर्भमा महत्त्वपूर्ण मानिन्छ ।
