काठमाडौँ। भेनेजुएलाकी विपक्षी नेतृ तथा कार्यकर्ता मारिया कोरिना मचाडोले आज (शुक्रबार) प्रतिष्ठित नोबेल शान्ति पुरस्कार जितेकी छन्।
नर्वेजियन नोबेल समितिका अध्यक्ष जोर्गन वाटने फ्राइड्नेसले मचाडोलाई 'गहिरो रूपमा विभाजित राजनीतिक विपक्षमा साझा आधार फेला पार्ने एकीकृत र साहसी नेतृत्वको प्रतीक' भएको भन्दै सम्मान गरेका हुन्।
फ्राइड्नेसले गत वर्ष मचाडोलाई लुकेर बस्न बाध्य पारिएको र उनको जीवनविरुद्ध गम्भीर खतराहरूका बावजुद देशमा रही लाखौँलाई प्रेरित गरेको उल्लेख गरे। उनले अधिनायकवादीहरूले सत्ता कब्जा गर्दा उठ्ने र प्रतिरोध गर्ने स्वतन्त्रताका साहसी रक्षकहरूलाई चिन्नु महत्त्वपूर्ण हुने बताए।
भेनेजुएलाका राष्ट्रपति निकोलस मदुरोको सरकारले गत वर्षको राष्ट्रपति चुनावअघि मचाडोलाई अयोग्य ठहर गर्दै उनको चुनावी उम्मेदवारीलाई रोकेको थियो। उनको स्थानमा एडमुन्डो गोन्जालेजलाई उम्मेदवार बनाइएको थियो।
निर्वाचन परिषद्ले गोन्जालेजलाई विजेता घोषणा गरेपछि देशभर विरोध प्रदर्शन भड्किएको थियो, जसमा २० जनाभन्दा बढीको मृत्यु भएको थियो। मचाडो यस अवधिमा लुकेकी थिइन् र जनवरीदेखि सार्वजनिक रूपमा देखा परेकी छैनन्।
शान्ति पुरस्कार नर्वेको ओस्लोमा वार्षिक रूपमा प्रदान गरिन्छ। यसअघि गत वर्षको पुरस्कार जापानी आणविक विस्फोटबाट बचेका निहोन हिडान्क्योलाई दिइएको थियो। स्विडेनको स्टकहोममा यस हप्ता चिकित्साशास्त्र, भौतिकशास्त्र, रसायनशास्त्र र साहित्यका पुरस्कारहरू वितरण भइसकेका छन् भने अर्थशास्त्रको पुरस्कार विजेताको घोषणा सोमबार हुने अपेक्षा गरिएको छ।
