काठमाडौँ। नेपालको विद्युतीय यातायात प्रणालीलाई दिगो र प्रभावकारी बनाउन कुमारी बैङ्क लिमिटेड र जर्मनीको गेसेलशाफ्ट फर इन्टरनेशनेल ज़ुसामेनरबीट (जीआईजेड) जीएमबीएच (जीआईजेड नेपाल) बीच नेपालका लागि दिगो विद्युतीय यातायात (नेपालको लागि दिगो विद्युतीय यातायात - सेटफरएनपीएल) परियोजना अन्तर्गत सम्झौता (समझदारी पत्र) सम्पन्न भएको छ।

यस सम्झौतामार्फत विद्युतीय यातायात सेवा सञ्चालन गर्ने व्यवसायीहरूलाई ऋण प्रवाह, प्रविधिगत परामर्श र क्षमता अभिवृद्धि कार्यक्रममार्फत सहयोग गरिनेछ। परियोजनाको उद्देश्य नेपालमा विद्युतीय सवारी साधनहरूको उत्पादन, प्रयोग र व्यवस्थापन प्रणालीलाई सुदृढ बनाउँदै हरित ऊर्जाको प्रवर्द्धन गर्नु रहेको छ।

सेटफरएनपीएल परियोजना जर्मन सहयोग संस्था (जीआईजेड नेपाल) र विश्व हरित वृद्धिका लागि संस्था (जीजीजीआई) सँग मिलेर सञ्चालन भइरहेको हो। यो परियोजना मिटिगेशन एक्सन फसिलिटी (एमएएफ) को सहकार्यमा सञ्चालित छ। जसअन्तर्गत नेपालका करिब ३५० साना तथा ठूला विद्युतीय यातायात व्यवसायहरूलाई आर्थिक सहयोग प्रदान गरिनेछ। यसले विद्युतीय सवारी साधनको प्रयोग बढाई प्रदूषण घटाउने र ऊर्जामा आत्मनिर्भरता बढाउने लक्ष्य लिएको छ।

परियोजनाअन्तर्गत विद्युतीय सवारी सञ्चालन गर्ने व्यवसायहरूलाई ऋण प्याकेज र अनुदान सहयोग (सबसिडी) उपलब्ध गराइनेछ। यसले व्यवसायीहरूलाई विद्युतीय सवारी किन्ने, सञ्चालन र मर्मत सम्भारका लागि सहज पहुँच दिलाउनेछ।

साथै, सेटफरएनपीएल अन्तर्गत विद्युतीय यातायात व्यवस्थापन सुधारका लागि मोबाइल एप्लिकेसन, जिपिएस उपकरण, एलईडी मार्ग प्रदर्शन प्रणाली र खुला इलेकट्रोनिक टिकटिङ प्रणाली जस्ता प्रविधिहरू पनि प्रयोगमा ल्याइनेछ।

कुमारी बैङ्कले यो सहकार्यबाट नेपालमा दिगो ऊर्जा प्रयोग र हरित यातायात प्रणाली विकासमा योगदान पुग्ने विश्वास व्यक्त गरेको छ। बैङ्कका प्रतिनिधिहरूका अनुसार, वातावरणमैत्री प्रविधिको उपयोग र विद्युतीय सवारी साधनको विस्तारले नेपालमा दिगो आर्थिक वृद्धिमा टेवा पुग्नेछ।