क्युबाका असन्तुष्ट नेताले देश छोडे, अमेरिका गए निर्वासनमा
हाम्रा कुरा
प्रकाशित २०८२ असोज २८ मंगलबार
2.2k
Shares
काठमाडौँ। क्युवाका असन्तुष्ट तथा प्रजातन्त्र समर्थक आन्दोलनका नेता जोसे ड्यानियल फेररलाई सोमबार जेलमुक्त गरी विमानमार्फत अमेरिका पठाइएको छ।
लामो समयसम्म प्रजातन्त्र समर्थक आन्दोलनको नेतृत्व गर्दै पटक–पटक जेल परेका ५५ वर्षीय फेररले यसै महिना जेलमा 'यातना' र 'अपमान' भोगेको भन्दै निर्वासनको विकल्प रोजेको घोषणा गरेका थिए।
जेलबाट लेखिएको एक पत्रमा फेररले भनेका छन्, "पूर्व अमेरिकी राष्ट्रपति जो बाइडेन सँगको सम्झौताअन्तर्गत केही समयका लागि रिहा भए पनि अप्रिलमा पुनः जेल परेपछि म विरूद्ध 'तानाशाहीको क्रुरता'को कुनै सीमा छैन।" उनले जेलभित्र 'आक्रमण, यातना, अपमान, धम्की र चरम अवस्था' भोग्नुपरेको र 'शासनका अनुयायी'हरूले तोकेका 'खाना र स्वच्छ उत्पादनहरू' समेत चोरी हुनेगरेको बताए।
फेररले आफ्नी श्रीमतीलाई पनि जेल हाल्ने र सानो छोरालाई बाल अपराधीहरूको संस्थामा पठाउने धम्की का कारण आफूले देश छोड्ने निर्णय गरेको उल्लेख गरे।
यस सन्दर्भमा हवानास्थित विदेश मन्त्रालयले एक विज्ञप्ति जारी गर्दै फेरर र उनका परिवारका सदस्यहरू सोमबार अमेरिकी सरकारको औपचारिक अनुरोध र असन्तुष्टको स्पष्ट स्वीकृतिपछि देश छाडेर अमेरिका प्रस्थान गरेको उल्लेख गरेको छ।
