काठमाडौँ। थाइल्यान्डको सर्वोच्च अदालतले सोमबार जेलमा रहेका पूर्व प्रधानमन्त्री थाक्सिन सिनावात्रालाई आफ्नो टेलिकम कम्पनीको बिक्रीमा कर फिर्ता गर्न आदेश दिएको छ।
सन् २००६ मा थाक्सिनको कम्पनी शिन कर्पको सेयरको करमुक्त बिक्रीलाई लिएर विवादमा फसेपछि उनीमाथि भ्रष्टाचारको आरोप लागेको थियो। त्यसपछि उनलाई सेनाले 'कु' गरी प्रधानमन्त्रीबाट हटाएको थियो र उनी एक दशकभन्दा बढी समय निर्वासनमा रहेका थिए। हाल ७६ वर्षीय थाक्सिन आफ्नो कार्यकालमा लागेको भ्रष्टाचारको आरोपमा बैङ्ककमा जेल सजाय भोगिरहेका छन्।
सोमबार सर्वोच्च अदालतले कर मुद्दामा पुनरावेदन अदालतको फैसलालाई खारेज गर्दै राजस्व विभागको आदेश पालना गर्न थाक्सिनलाई बाध्य पारेको अदालतका प्रवक्ता सुरियान होङभिलाईले एएफपीलाई बताए। थाई सञ्चारमाध्यमका अनुसार अदालतले थाक्सिनलाई १७.६ अर्ब भाट (झण्डै ५४ करोड अमेरिकी डलर) कर दायित्व र जरिवानाको रूपमा तिर्न आदेश दिएको छ।
यो विवाद थाक्सिनले सन् २००६ मा शिन कर्पलाई सिङ्गापुरको टेमासेक होल्डिङ्सलाई बिक्री गर्दा कर तिर्नुपर्थ्यो कि पर्दैनथ्यो भन्ने विषयमा केन्द्रित थियो। सिनावात्रा परिवारलाई १.९ अर्ब डलरको अप्रत्याशित लाभ दिने उक्त सम्झौताको विरोधले उनीको राजनीतिक जीवनमा ठूलो असर पारेको थियो। सिनावात्रा वंशलाई सैन्य समर्थक, राजपरिवार समर्थक अभिजात वर्गले परम्परागत सामाजिक व्यवस्थाको लागि खतराको रूपमा हेर्दै आएका छन्। गत अगस्टमा थाक्सिनकी छोरी पेतोङटार्नलाई नैतिकता उल्लङ्घन गरेको भन्दै प्रधानमन्त्रीबाट हटाउने आदेशसहित यो वंशले हालै कानुनी र राजनीतिक असफलताको सामना गर्नुपरेको छ।
