काठमाडौँ। फ्रान्सेली प्रहरी नियन्त्रक लुकास फिलिप बिहीबार अन्तर्राष्ट्रिय आपराधिक प्रहरी सङ्गठन इन्टरपोलको प्रमुखमा चुनिएका छन्।
मोरक्कोमा सम्पन्न ९३औँ सम्मेलनमा उनले यातनालाई प्रश्रय दिएको भन्दै यूरोपबाट धेरै न्यायिक उजुरी परेका इमिराती अहमद नासिर अल–राइसीको स्थान लिएका हुन्। इन्टरपोलको अध्यक्षको भूमिका प्रत्येक चार वर्षमा आलोपालो हुने भए पनि यो शीर्षक धेरै हदसम्म प्रतीकात्मक छ।
मोरक्कोको सरकारी समाचार संस्था (एमएपी) का अनुसार, फ्रान्सेली प्रहरी निर्देशकका लागि युरोपेली र अन्तर्राष्ट्रिय मामिलाका सल्लाहकारका रूपमा पनि काम गर्दै आएका ५३ वर्षीय फिलिपले ८४ मत प्राप्त गरे भने उपविजेता टर्किस मुस्तफा सेर्कान साबान्काले ६० मत प्राप्त गरे। अन्य प्रतिस्पर्धी नामिबियाकी एनी मेरी नैन्डाले १२ र इथियोपियाकी डेमेलास गेब्रेमिचेल वेल्डेसले ८ मत प्राप्त गरेका थिए।
फिलिपले भने, “मेरो स्पष्ट उद्देश्य विश्वव्यापी सन्दर्भको रूपमा सङ्गठनको भूमिकालाई सामूहिक सुरक्षाका लागि सुदृढ पार्नु रहनेछ।”
सन् १९८९ देखि सञ्चालनमा रहेको इन्टरपोलको मुख्यालय फ्रान्सको लियोनमा रहेको छ भने यसको दैनिक कामकाज गर्ने जिम्मा इन्टरपोलका महासचिवलाई नै दिइन्छ। हाल महासचिवको पद सन् २०२४ नोभेम्बरमा पाँच वर्षको कार्यकालका लागि निर्वाचित भएका ब्राजिलियन वाल्डेसी उक्र्विजाले सम्हालेका छन्।
राइसीबाहेक, पूर्वप्रमुख तथा चिनियाँ राजनीतिज्ञ मेङ होङवेई पनि सन् २०१६ मा अध्यक्ष बने पनि विवादरहित हुन सकेका थिएनन्। बेइजिङले भ्रष्टाचारको आरोपमा मेङलाई सन् २०२० मा साढे १३ वर्षको जेल सजाय सुनाएको थियो।
