-
-
-
-
काठमाडौँ । म्यानमारमा बहुदलीय लोकतान्त्रिक निर्वाचनको पहिलो चरण आइतबारदेखि शुरू भएको छ ।
पहिलो चरणको मतदानसँगै २०२५ को बहुदलीय लोकतान्त्रिक आम निर्वाचन शुरू भएको हो ।
यो निर्वाचन तीन चरणमा सम्पन्न हुने तालिका रहेको छ । जसअनुसार दोस्रो चरण २०२६ जनवरी ११ र तेस्रो चरण २०२६ जनवरी २५ मा हुनेछ ।
यस निर्वाचनमा ५७ राजनीतिक दलका करिब पाँच हजार उम्मेदवारहरूले देशभरका छ सय ९२ निर्वाचन क्षेत्रहरूमा प्रतिस्पर्धा गरिरहेका छन् ।
यसले संघीय संसदका दुवै सदन र राज्य तथा क्षेत्रीय संसदहरूका लागि प्रतिनिधिहरू चयन गर्नेछ ।
निर्वाचित संघीय संसदले नयाँ राष्ट्रपति चयन गर्नेछ । जसले आगामी नयाँ संघीय सरकार गठन गर्नेछ ।
निर्वाचन आयोगकाअनुसार मतदानका लागि देशभर कुल २१ हजार पाँच सय १७ मतदान केन्द्र स्थापना गरिएका छन् ।
