मादुरोको गिरफ्तारी आधुनिक विश्वका लागि स्वीकार्य छैन: शंकर पोखरेल
हाम्रा कुरा
प्रकाशित २०८२ पुष २० आइतबार
671
Shares
काठमाडौं। नेकपा (एमाले) का महासचिव शंकर पोखरेलले भेनेजुएलाका राष्ट्रपति निकोलस मादुरोलाई अमेरिकी सेनाले नियन्त्रणमा लिएको घटनाप्रति कडा आपत्ति जनाएका छन्। आइतबार सामाजिक सञ्जाल फेसबुकमार्फत उनले यस कदमलाई संयुक्त राष्ट्रसङ्घको बडापत्रको ठाडो उल्लङ्घन र आधुनिक सभ्यताका लागि अस्वीकार्य विषय भएको बताएका हुन्।
राष्ट्रसङ्घको औचित्यमाथि प्रश्न महासचिव पोखरेलले कुनै एक देशका जननिर्वाचित राष्ट्र प्रमुखलाई अर्को देशको राष्ट्र प्रमुखको आदेशमा सैन्य हस्तक्षेपमार्फत नियन्त्रणमा लिने कार्यले संयुक्त राष्ट्रसङ्घ जस्ता विश्व संस्थाहरूको औचित्य नै समाप्त गरिदिएको उल्लेख गरेका छन्। "यस्तो कदम आधुनिक विश्व र सभ्य समाजका लागि स्वीकार्य विषय हुन सक्दैन, हुनु पनि हुँदैन," उनले लेखेका छन्।
अन्तर्राष्ट्रिय कानुन र सार्वभौमिकताको अपमान भेनेजुएलामा भएको अमेरिकी हस्तक्षेपले अन्तर्राष्ट्रिय कानुन, देशको सार्वभौमिकता र लोकतान्त्रिक मूल्यहरूमाथि गम्भीर प्रश्न उठाएको पोखरेलको ठहर छ। उनले यस्तो गम्भीर र संवेदनशील विषयमा स्वयं अमेरिकी समाजभित्रै जिम्मेवार बहस हुनुपर्ने खाँचो रहेको समेत औँल्याएका छन्।
महासचिव पोखरेलको यो भनाइ यस्तो समयमा आएको छ, जब भेनेजुएलाका राष्ट्रपति मादुरोलाई 'नार्को-आतङ्कवाद' को आरोपमा अमेरिकी विशेष दस्ताले पक्राउ गरी न्युयोर्क पुर्याएको छ। नेपालका विभिन्न राजनीतिक दलका नेताहरूले यस घटनालाई शक्ति राष्ट्रको 'दादागिरी' भन्दै विरोध गरिरहेका छन्।
