पन्ध्र क्षेत्रमा रास्वपा विजयी, १०२ स्थानमा अग्रता कायमै
हाम्रा कुरा
प्रकाशित २०८२ फागुन २३ शनिबार
832
Shares
काठमाडौँ । प्रतिनिधिसभा सदस्य निर्वाचनको जारी मतगणनामा राष्ट्रिय स्वतन्त्र पार्टी (रास्वपा) ले ऐतिहासिक सफलता हात पारेको छ। निर्वाचन आयोगका अनुसार आज बिहान ६ बजेसम्मको परिणाममा रास्वपाले १५ वटा निर्वाचन क्षेत्रमा जित हासिल गरिसकेको छ भने अन्य १०२ क्षेत्रमा उसका उम्मेदवारहरू अगाडि छन्।
आयोगका अनुसार रास्वपाबाट मोरङ ४ मा सन्तोष राजवंशी, मोरङ ६ मा रुविना आचार्य, धनुषा ३ मा मनिषा झा, काठमाडौँ १ मा रन्जु न्यौपाने, काठमाडौँ ३ मा राजुनाथ पाण्डे, काठमाडौँ ४ मा पुकार बम र काठमाडौँ ५ मा सस्मित पोखरेल विजयी भएका छन्। त्यस्तै, काठमाडौँ ७ मा गणेश पराजुली, काठमाडौँ ८ मा विराजभक्त श्रेष्ठ, काठमाडौँ ९ मा डोलप्रसाद अर्याल, काठमाडौँ १० मा प्रदीप विष्ट, कास्की २ मा उत्तमप्रसाद पौडेल, कास्की ३ मा बिना गुरुङ, रुपन्देही ४ मा कन्हैया बानियाँ र बाँके १ मा सुरेशकुमार चौरी निर्वाचित भएका छन्।
हालसम्म २० स्थानको अन्तिम नतिजा सार्वजनिक भएको छ। नेपाली कांग्रेसले ३ क्षेत्रमा जित निकालेको छ, जसमा मनाङबाट टेकबहादुर गुरुङ, मुस्ताङबाट योगेश गौचन थकाली र दैलेख १ बाट बासना थापा विजयी भएका छन्। कांग्रेस अहिले ११ स्थानमा अगाडि छ।
यता, नेपाली कम्युनिस्ट पार्टीका तर्फबाट रुकुम पूर्वमा पार्टी संयोजक पुष्पकमल दाहाल 'प्रचण्ड' विजयी भइसकेका छन्। नेकपाका उम्मेदवारहरू ११ क्षेत्रमा अग्रस्थानमा छन्। नेकपा (एमाले) बाट बाँके १ मा मोहम्मद इश्तियाक राई विजयी भएका छन् भने एमालेका उम्मेदवार १२ क्षेत्रमा अगाडि छन्।
जारी मतगणनामा श्रम संस्कृति पार्टी ३, राष्ट्रिय प्रजातन्त्र पार्टी (राप्रपा) १ र स्वतन्त्र उम्मेदवार १ स्थानमा अगाडि छन्। कुल १६५ निर्वाचन क्षेत्रमध्ये हाल १६० क्षेत्रमा मतगणना भइरहेको छ।
