काठमाडौँ ।  जोर्डन र भेनेजुएलाबीच कूटनीतिक सम्बन्ध स्थापना भएको सात दशकभन्दा बढी समयपछि पहिलो पटक भेनेजुएलाका विदेशमन्त्रीबाट जोर्डनको ऐतिहासिक भ्रमण भएको छ। यस भ्रमणका क्रममा आइतबार दुई देशबिच विभिन्न चारवटा सहयोग सम्झौतामा हस्ताक्षर भएको छ।

जोर्डनका उपप्रधानमन्त्री एवं परराष्ट्रमन्त्री आयमान सफादी र उनका भेनेजुएली समकक्षी इभान गिलबीच राजधानी अम्मानमा भेटवार्ता भएको थियो। उक्त भेटघाटका क्रममा कृषि, ऊर्जा, लगानी, पर्यटन र सूचना प्रविधि जस्ता महत्त्वपूर्ण क्षेत्रहरूमा आपसी सहयोग विस्तार गर्नेबारे गहन छलफल भएको थियो।

दुई देशका कूटनीतिज्ञहरूले संयुक्त द्विपक्षीय समिति गठन, राजनीतिक परामर्श संयन्त्रको सुरुवात, कृषि सहयोग र कूटनीतिक तालिम अभिवृद्धि गर्ने सम्बन्धी सम्झौता तथा समझदारी पत्रमा हस्ताक्षर गरेका छन्। यसका साथै लगानी संरक्षण, दोहोरो करमुक्ति र भिसा छुटसम्बन्धी आगामी सम्झौताहरूलाई पनि छिटोभन्दा छिटो टुङ्गोमा पुर्‍याउन दुवै पक्ष सहमत भएका छन्।

संयुक्त पत्रकार सम्मेलनलाई सम्बोधन गर्दै मन्त्री सफादीले मध्यपूर्वमा जारी तनाव कम गर्ने र यस क्षेत्रमा स्थायित्व पुनर्बहाली गर्ने विषयमा समेत छलफल भएको जानकारी दिए। सो क्रममा उनले दुई–राज्य समाधानप्रति भेनेजुएलाले देखाएको दृढ समर्थनको प्रशंसा समेत गरे।

यसैगरी, विदेशमन्त्री गिलले भेनेजुएलाका कार्यवाहक राष्ट्रपति डेल्सी रोड्रिग्वेजको तर्फबाट जोर्डनको ८० औँ स्वतन्त्रता दिवसको अवसरमा शुभकामना सन्देश हस्तान्तरण गरे। उनले भेनेजुएला जोर्डनका लागि दक्षिण अमेरिका र क्यारिबियन क्षेत्रको प्रवेशद्वार बन्न सक्ने उल्लेख गर्दै दुई राष्ट्रबीचको आर्थिक पूरकतामा जोड दिए। गिलले भेनेजुएलाको बजारमा जोर्डनको प्राविधिक विशेषज्ञता र व्यवसायहरूलाई आकर्षित गर्न आफूहरू उत्सुक रहेको बताए।

यो उच्चस्तरीय भेटघाट जोर्डनका विदेशमन्त्री सफादीले गत फेब्रुअरीमा गरेको काराकास भ्रमणको निरन्तरता स्वरूप भएको हो। उक्त भ्रमण जोर्डनका कुनै पनि विदेशमन्त्रीले भेनेजुएलामा गरेको पहिलो ऐतिहासिक भ्रमण थियो।