हिजबुल्लाहलाई धराशायी बनाउन सैन्य आक्रमण तीव्र पार्ने नेतन्याहुको घोषणा
हाम्रा कुरा
प्रकाशित २०८३ जेठ १३ बुधबार
1.8k
Shares
काठमाडौँ । इजरायली प्रधानमन्त्री बेन्जामिन नेतन्याहुले लेबनानस्थित सशस्त्र समूह हिजबुल्लाहलाई धराशायी बनाउन सैन्य आक्रमणको तीव्रता बढाउने घोषणा गरेका छन्। एक भिडियो सन्देश जारी गर्दै प्रधानमन्त्री नेतन्याहुले लेबनानमा जारी सैन्य कारबाहीलाई थप सशक्त बनाइने बताएका हुन्।
आफ्नो वक्तव्यमा नेतन्याहुले इजरायल हाल हिजबुल्लाहसँग युद्धको अवस्थामा रहेको उल्लेख गरे। पछिल्ला केही हप्ताहरूमा मात्रै इजरायली सेनाले लेबनानमा ६ सय भन्दा बढी हिजबुल्लाह लडाकुहरूलाई मारिसकेको दाबी उनले गरे। प्रधानमन्त्री नेतन्याहुले सैन्य अभियानलाई थप तीव्रताका साथ अघि बढाउन निर्देशन दिएको बताउँदै हिजबुल्लाहको शक्तिलाई पूर्ण रूपमा नष्ट गर्ने दृढता व्यक्त गरे।
प्रधानमन्त्री नेतन्याहुले हिजबुल्लाहले प्रयोग गर्ने ‘फाइबर अप्टिक ड्रोन’ आक्रमणहरूको सामना गर्न एउटा विशेष टोलीले कार्य गरिरहेको जानकारी पनि दिए। यसैबिच, इजरायली रक्षा बल (आईडीएफ) ले एक विज्ञप्ति जारी गर्दै लेबनानको पूर्वी बेका उपत्यका र देशका अन्य विभिन्न क्षेत्रमा रहेका हिजबुल्लाहका पूर्वाधारहरूमा आक्रमण सुरु गरिएको जनाएको छ।
गत अप्रिलमा इजरायल र लेबनानबिच युद्धविरामको सहमति भएको भए पनि सीमा क्षेत्रमा तनाव कम हुन सकेको छैन। सम्झौताका बावजुद इजरायलले लेबनानमा लगभग दैनिक रूपमा हवाई आक्रमण जारी राखेको छ भने हिजबुल्लाहले पनि इजरायली सैन्य ठेगानाहरूलाई लक्षित गरी प्रतिशोधात्मक आक्रमणहरू गर्दै आएको छ।
