काठमाडौँ । भारतको राजधानी नयाँ दिल्लीस्थित एक होटलमा बुधबार बिहान भीषण आगलागी हुँदा कम्तीमा २१ जनाको मृत्यु भएको छ भने दर्जनौँ व्यक्ति घाइते भएका छन्। प्रहरीका अनुसार यो घटना राजधानी दिल्लीमा पछिल्ला वर्षहरूमा भएको सबैभन्दा घातक र विनाशकारी आगलागीमध्ये एक हो।
दिल्लीको दक्षिणी भागमा रहेको भीडभाडयुक्त बस्तीमा अवस्थित 'फ्लोरिस स्टे' नामक बेड–एन्ड–ब्रेकफास्ट होटलमा बुधवार बिहान अचानक आगो सल्किएको थियो। भवनभित्र आगो तीव्र रूपमा फैलिएका कारण त्यहाँ बसिरहेका पाहुना र कार्यरत कर्मचारीहरू बाहिर निस्कन नपाई भित्रै फसेका थिए।
आगलागीको सूचना पाउनासाथ घटनास्थलमा आठ वटा दमकल परिचालन गरिएको थियो। अग्नीनियन्त्रकहरूको लामो र कडा प्रयासपछि मात्र आगोलाई नियन्त्रणमा लिन सम्भव भएको थियो।
प्रहरी र आपत्कालीन सेवाका टोलीहरूले भवनभित्र फसेका मानिसहरूको उद्धार गरी ४० भन्दा बढी घाइतेलाई उपचारका लागि नजिकैका अस्पतालहरूमा भर्ना गरेका छन्। अस्पताल पुर्यााइएकामध्ये २१ जनालाई चिकित्सकहरूले मृत घोषित गरिसकेका छन्। घटनास्थलमा अझै पनि खोजी तथा उद्धार कार्य जारी रहेको प्रहरीले जनाएको छ।
स्थानीय सञ्चारमाध्यमहरूका अनुसार ज्यान गुमाउनेहरूमध्ये धेरैजसो अफ्रिकी मुलुकका नागरिकहरू रहेको अनुमान गरिएको छ, जो उपचार तथा विभिन्न व्यक्तिगत प्रयोजनका लागि दिल्ली आएका थिए। यद्यपि, अधिकारीहरूले मृतकहरूको आधिकारिक र पूर्ण विवरण सार्वजनिक गर्न बाँकी नै छ।
प्रधानमन्त्री नरेन्द्र मोदीले यस घटनालाई ‘अत्यन्त दुःखद्’ भन्दै गहिरो शोक व्यक्त गरेका छन्। प्रधानमन्त्री कार्यालयले सामाजिक सञ्जालमार्फत एक विज्ञप्ति जारी गर्दै मृतकका परिवारप्रति हार्दिक समवेदना प्रकट गरेको छ।
प्रहरीका अनुसार आगलागीको वास्तविक कारणबारे प्रारम्भिक रूपमा कुनै ठोस निष्कर्ष आइसकेको छैन। तर, भारतमा हुने यस्ता ठुला आगलागीका घटनाहरूमा विद्युत् सर्ट सर्किट, पुराना तथा कमजोर तारजडान र भवन सुरक्षा मापदण्डको चरम बेवास्ता नै मुख्य कारण हुने गरेको विज्ञहरू बताउँछन्।
भारतमा भवनहरूमा आगलागी हुने शृङ्खला नौलो होइन। यसअघि गत मार्च महिनामा पनि पूर्वी भारतको एक सरकारी अस्पतालमा आगलागी हुँदा १० जना गम्भीर बिरामीको मृत्यु भएको थियो। दिल्लीको यो पछिल्लो दर्दनाक घटनाले होटल तथा आवासीय भवनहरूमा अग्नि सुरक्षाका मापदण्डहरू कडाइका साथ लागू गर्नुपर्ने टड्कारो आवश्यकतालाई पुनः उजागर गरिदिएको छ।
