एभियाँ। फ्रान्समा भएको  जी७ शिखर सम्मेलनको अवसरमा भारतका प्रधानमन्त्री नरेन्द्र मोदी र संयुक्त राज्य अमेरिकाका राष्ट्रपति डोनाल्ड जे. ट्रम्प बीच बुधवार फ्रान्सको एभियाँमा उच्चस्तरीय भेटवार्ता सम्पन्न भएको छ। भेटमा दुवै नेताले भारत–अमेरिका सम्बन्ध, विश्व शान्ति, व्यापार, रक्षा, ऊर्जा तथा समुद्री सुरक्षासहितका विविध विषयमा विस्तृत छलफल गरेका छन्।

भेटका क्रममा प्रधानमन्त्री मोदीले पश्चिम एसियामा जारी द्वन्द्व अन्त्य गरी क्षेत्रीय शान्ति र स्थायित्व कायम गर्ने दिशामा राष्ट्रपति ट्रम्पले खेलेको भूमिकाको प्रशंसा गरेका थिए। उनले विशेष रूपमा होर्मुज जलडमरूमध्यमा निर्बाध समुद्री आवागमन, अन्तर्राष्ट्रिय व्यापारको स्वतन्त्र प्रवाह तथा समुद्री मार्गको सुरक्षा सुनिश्चित गर्नु अत्यन्त आवश्यक रहेको बताएका थिए।

प्रधानमन्त्री मोदीले विश्वव्यापी आपूर्ति शृङ्खला, ऊर्जा ढुवानी तथा अन्तर्राष्ट्रिय व्यापारका लागि समुद्री मार्गहरूको रणनीतिक महत्त्व औँल्याउँदै भारतीय व्यापारिक जहाजहरू, विश्वभर सञ्चालनमा रहेका भारतीय समुद्री जहाज तथा हजारौँ भारतीय नाविकहरूको सुरक्षा भारतको प्रमुख चासोको विषय रहेको स्पष्ट पारेका थिए। उनले समुद्री क्षेत्रमा कार्यरत नाविकहरूको सुरक्षा, सुरक्षित जलमार्ग र नियममा आधारित समुद्री व्यवस्थाको संरक्षणका लागि अन्तर्राष्ट्रिय सहकार्यलाई थप मजबुत बनाउनुपर्ने धारणा व्यक्त गरेका थिए।

दुवै नेताले सन् २०२५ फेब्रुअरीमा वासिङ्टन डिसीमा भएको भेटपछि भारत–अमेरिका कम्प्याक्ट (सैन्य साझेदारी, तीव्र व्यापार तथा प्रविधिगत सहकार्य विस्तार गर्ने पहल) अन्तर्गत हासिल भएका उपलब्धिहरूको समीक्षा गरेका थिए। उनीहरूले रक्षा, रणनीतिक प्रविधि, ऊर्जा तथा द्विपक्षीय व्यापारका क्षेत्रमा उल्लेखनीय प्रगति भएकोमा सन्तोष व्यक्त गरेका छन्।

भेटवार्ताका क्रममा दुवै पक्षले अन्तरिम द्विपक्षीय व्यापार सम्झौता सम्बन्धी वार्ता सकारात्मक दिशामा अघि बढेको उल्लेख गर्दै छिट्टै सन्तुलित, पारस्परिक रूपमा लाभदायी तथा व्यावसायिक रूपमा प्रभावकारी सम्झौता निष्कर्षमा पुर्‍याउन सम्बन्धित अधिकारीहरूलाई निर्देशन दिएका छन्। यसै सन्दर्भमा अमेरिकी व्यापार प्रतिनिधि जेमिसन ग्रियर आगामी साता भारत भ्रमणमा आउने जनाइएको छ।

प्रधानमन्त्री मोदी र राष्ट्रपति ट्रम्पले भारत–अमेरिका व्यापक विश्वव्यापी रणनीतिक साझेदारीलाई अझ सुदृढ बनाउने प्रतिबद्धता पुनः व्यक्त गर्दै रक्षा, प्रविधि, ऊर्जा, व्यापार, समुद्री सुरक्षा तथा जनस्तरको सहकार्यका सबै क्षेत्रमा सहयोग विस्तार गर्ने सहमति जनाएका छन्।

विश्लेषकहरूका अनुसार, यो भेटवार्ताले भारत–अमेरिका सम्बन्धलाई थप उचाइमा पुर्‍याउनुका साथै पश्चिम एसियाको सुरक्षा अवस्था, समुद्री मार्गको संरक्षण र विश्वव्यापी व्यापारिक स्थायित्वका विषयमा दुवै देशबीचको साझा दृष्टिकोणलाई थप स्पष्ट बनाएको छ।