काठमाडौँ । केप भर्डे पहिलो सहभागितामै विश्वकप फुटबलको नकआउट चरणमा प्रवेश गर्न सफल भएको छ । समूह एचका खेलमा अपराजित रहँदै केप भर्डे नकआउट चरणमा पुग्न सफल भएको हो ।
केप भर्डेले आज समूह चरणको अन्तिम खेलमा साउदी अरेबियासँग गोलरहित बराबरी खेल्यो ।
खेलमा ५१ प्रतिशत बल आफ्नो नियन्त्रणमा लिन सफल केप भर्डेले यसअघिका खेलमा समेत स्पेन र उरुग्वेसँग बराबरी खेल्दै अंक बाँडेको थियो ।
केप भर्डेले स्पेनसँग गोलरहित बराबरी खेलेको थियो भने उरुग्वेसँग २–२ गोलको बराबरी खेलेको थियो ।
केप भर्डे ३ अंकसहित उपविजेता बन्दै अन्तिम ३२ मा पुगेर कीर्तिमान रचेको हो ।
केप भर्डे विश्वकप खेल्ने राष्ट्रहरूमा सबैभन्दा थोरै जनसंख्या भएको देश हो । यसको जनसंख्या करिब पाँच लाख (४ लाख ९१ हजार २३३) मात्र रहेको छ । यो देशको क्षेत्रफल १ हजार ५५७ स्क्वायर मिटरमात्र छ ।
अब नकआउट चरणमा उसको भेट साविक विजेता अर्जेन्टिनासँग हुनेछ ।
यो समूहबाट स्पेन समूह विजेता बन्दै अन्तिम ३२ मा पुगेको छ भने उरुग्वे र साउदी बाहिरिएका छन् ।
स्पेनले उरुग्वेलाई १–० ले हराएको हो । स्पेनका लागि खेलको ४२ औँ मिनेटमा एलेक्स बाएनाले गोल गरे । उनले मार्कोस लोरेन्टेको पासमा गोल गरेका हुन् ।
