चीनले चुनावका लागि नेपाललाई ९० लाख युआन सहयोग गर्ने

प्रधानमन्त्री प्रचण्ड र चिनियाँ राष्ट्रपति ‘सी’बीच भेट

प्रकाशित मिति : २०७३ चैत १४ सोमबार
तस्वीर : सीएमप्रचण्ड डटकम

बेइजिङ्, चीन । चीनले नेपाललाई चुनावका लागि ९० लाख चिनियाँ युआन सहयोग गर्ने भएको छ । प्रधानमन्त्री पुष्पकमल दाहालसँगको भेटमा चिनियाँ राष्ट्रपति सी जिनपिङले नेपालमा चुनाव घोषणा भएकोमा खुशी प्रकट गर्दै त्यसको सफलताका लागि ९ मिलियन आरएमबी सहयोग गर्ने प्रतिवद्धता गरेका हुन् ।

भेटपछि प्रधानमन्त्री दाहालले चिनियाँ राष्ट्रपति सीसँग उत्साहका साथ खुल्ला र स्पष्ट छलफल भएको पनि बताएका छन् । चीनको राजधानी बेइजिङस्थित ग्रेट अफ दि पिपुलमा दिउँसो भएको भेट महत्वपूर्ण र उपलब्धिमूलक रहेको र यस खालको उच्चस्तरीय छलफलले नेपाल चीन सम्बन्धको विकासमा महत्वपूर्ण आयाम थपेको प्रधानमन्त्री दाहालको भनाई छ ।

भेटमा प्रधानमन्त्रीले आफूले उठाएका सबै विषयमा राष्ट्रपतिबाट सकारात्मक जवाफ आएको बताउँदै छलफल सोचेभन्दा पनि माथि रहेको बताए । नेपालले उठाएका सबै विषयको सकारात्मक सम्बोधन हुनु र अझ राष्ट्रपति आफैले नेपालको राजनीतिक स्थायित्व, विकास, सम्वृद्धिसहित पूर्वाधार विकास, रेल्वे र तातोपानी नाका खोल्ने जस्ता विषयमा चासोका साथ प्रस्तुत गर्नुले छलफल राष्ट्रका लागि धेरै महत्वपूर्ण रहेको प्रधानमन्त्रीको प्रतिक्रिया छ ।

राष्ट्रपतिसँगको छलफलमा नेपाल र चीनबीच दुई देशीय सम्बन्ध र आपसी हितका विषयमा समेत छलफल भएको बताइएको छ । भेटमा प्रधानमन्त्री दाहालले २०७२ को गोरखा भूकम्पपछि बन्द भएको तातोपानी नाका सञ्चालन गर्न आग्रह गरे ।

ईआइसिटी नेपाल प्रालिद्धारा संचालित हाम्राकुरा डटकममा प्रकाशित कुनै पनि सामाग्री ईआइसिटी नेपालको पूर्व जानकारी विना हुवहु एवं आंशिक रुपमा समेत कपी गरि प्रकाशन गर्नु दण्डनीय छ। यस किसिमका कार्य गर्ने उपर ईआइसिटी नेपाल कानुनी उपचार खोज्न बाध्य हुने भएकाले सम्बन्धित सवैलाई सचेत हुन जानकारी गराइन्छ।

नयाँ