निधिको कार्यकक्षमा काँग्रेसका मन्त्रीहरुको आकस्मिक बैठक

प्रकाशित मिति : २०७३ चैत २४ बिहिबार
काठमाडौं । प्रमुख सत्तासाझेदार दल नेपाली काँग्रेसलाई नजरअन्दाज गर्न खोजिएको भन्दै काँग्रेसबाट उपप्रधान तथा गृहमन्त्री रहेका विमलेन्द्र निधि राजीनामा दिने मनस्थितिमा पुगेका छन् ।
 
निधि बाहिरिने र अब के गर्ने भन्ने विषयमा सिंहदरबारस्थित निधिकै कार्यकक्षमा काँग्रेसका मन्त्रीहरुको आकस्मिक बैठक बसेको छ । बैठकमा १३ जना मन्त्री उपस्थित रहेका बताइएको छ । बैठकमा निधिको राजीनामा र आगामी पोजिसनकाबारेमा छलफल भइरहेको स्रोतले बताएको छ ।
 
उपप्रधान्मन्त्रीको वरियता विवाद चुलिएपछि निधि प्रधानमन्त्री पुष्पकमल दाहाल र काँग्रेस सभापति एवं संसदीय दलको नेता शेरबहादुर देउवासँग गुनासो गरिरहेका छन् । बैठकमा पनि उनले मुख्य सत्तासाझेदार दललाई नजर अन्दाज गर्ने काम भएको र काँग्रेस नेतृत्वबाट पनि प्रस्टसँग कुरा गर्न नसकेको भन्ने गुनासो सुनाए ।  
 
कमल थापा उपप्रधानमन्त्री भएर सरकारमा आएदेखि प्रधानमन्त्री पुष्पकमल दाहालले हालसम्म वरियताक्रम मिलाउन सकेका छैनन् । वरियता विवादकै कारण विहिबार दिउँसो ३ बजेका लागि डाकेको मन्त्रिपरिषद् बैठक बस्न नसकेको बताइएको छ ।
 
वरियता विवादकै कारण प्रधानमन्त्री दाहालले साताव्यापी चीन भ्रमणको अवधिमा पनि कार्यवहाक प्रधानमन्त्रीको जिम्मा दिन सकेनन् । मन्त्री निधिले प्रमुख सत्ता साझेदार र गृहमन्त्री भएको हैसियतले वरियतामा आफु पहिलो हुनुपर्ने धारणा राख्दै आएका छन् ।
 
काँग्रेस मन्त्रीहरुको आकस्मिक बैठकबाट बाहिरिएका परराष्ट्रमन्त्री प्रकाशशरण महतले भने मधेसी मोर्चासँगको वार्ताबारे छलफल गर्न बोलाएको भने । उनले अगाडि भनेका छन्, ‘मधेसी मोर्चासँगको वार्ताका विषयमा ब्रिफ थियो । त्यसैका लागि बोलाउनु भएको थियो ।’ थप कुरा नबोली मन्त्री महत बाहिरिए ।

ईआइसिटी नेपाल प्रालिद्धारा संचालित हाम्राकुरा डटकममा प्रकाशित कुनै पनि सामाग्री ईआइसिटी नेपालको पूर्व जानकारी विना हुवहु एवं आंशिक रुपमा समेत कपी गरि प्रकाशन गर्नु दण्डनीय छ। यस किसिमका कार्य गर्ने उपर ईआइसिटी नेपाल कानुनी उपचार खोज्न बाध्य हुने भएकाले सम्बन्धित सवैलाई सचेत हुन जानकारी गराइन्छ।

नयाँ