नेपालको कुटनीतिक मर्यादामाथि प्रश्न, भारतमा राष्ट्रपतिलाई राज्यमन्त्रीले गरिन् स्वागत

प्रकाशित मिति : २०७४ बैशाख ४ सोमबार

काठमाडौं । भारतको पाँच दिने राजकीय भ्रमणमा गएकी राष्ट्रपति विद्यादेवी भण्डारी विमानस्थलमा भारतीय राज्यमन्त्रीले स्वागत गरेकी छन् । नयाँदिल्लीको ईन्दिरागान्धी अन्तर्राष्ट्रिय विमानस्थलमा भण्डारीलाई महिला तथा बालविकास राज्यमन्त्री कृष्णा राजले स्वागत गरेकी हुन् ।

भारतीय राष्ट्रपति प्रणव मुखर्जी नेपाल आउँदा राष्ट्रपति भण्डारी आफै त्रिभुवन अन्तर्राष्ट्रिय विमानस्थल पुगेर स्वागत गरेकी थिइन् । यद्यपि, नेपालको राष्ट्र प्रमुखलाई राज्यमन्त्रीले स्वागत गरिन् । त्यसअघि विमानस्थलमा ओर्लिएलगत्तै भण्डारीलाई भारतका लागि नेपाली राजदूत दीपकुमार उपाध्यायले स्वागत गरेका थिए । इन्दिरागान्धी विमानस्थलबाट राष्ट्रपति भण्डारी भारतीय राष्ट्रपति भवनतर्फ प्रस्थान गरिन् । राष्ट्रपति मुखर्जीको निमन्त्रणामा भण्डारी भारत भ्रमणमा गएकी हुन् ।

नेपालका कार्यकारी र राष्ट्रप्रमुखको भ्रमणको हकमा भारतले कुटनीतिक मर्यादाको विषयलाई नजरअन्दाज गर्ने गरेको भन्दै चर्को आलोचना भएको छ । यसअघि भारतीय प्रधानमन्त्री नरेन्द्र मोदीको निमन्त्रणामा भारतको राजकीय भ्रमणमा गएका तत्कालीन प्रधानमन्त्री केपी ओलीलाई विदेशमन्त्री सुषमा स्वराजले स्वागत गरेकी थिइन् ।

त्यसपछि भारत भ्रमणमा गएको प्रधानमन्त्री पुष्पकमल दाहाललाई समेत भारतीय विदेश मन्त्रीले स्वागत गरेकी थिइन् । यस्तै, माधव नेपाल र बाबुराम भट्टराई प्रधानमन्त्रीका हैसियतले भारत भ्रमणमा जाँदा राज्यमन्त्री र परराष्ट्रका कर्मचारीले स्वागत गरेका थिए । गिरिजाप्रसाद कोइराला प्रधानमन्त्री हुँदा भारतीय तत्काली प्रधानमन्त्री मनमोहन सिंहले स्वागत गरेका थिए ।  

तत्कालीन अमेरिकी राष्ट्रपति बाराक ओबामा आउँदा प्रधानमन्त्री नरेन्द्र मोदी आफै विमानस्थल पुगेर स्वागत गरेका थिए । भारतले नेपालका लागि प्रोटोकल फेरेको देख्दा विचित्र लाग्ने गरेको अन्तर्राष्ट्रिय मामिलाका जानकारहरु बताउँछन् । नेपालको कुटनीतिक मर्यादा कजोर भएको प्रश्न उठेपनि कसैले वास्ता गरेका छैनन् ।  
राष्ट्रपति भण्डारीलाई राष्ट्रपति भवनमा गार्डअफ अनर दिइने बताइएको छ । भारत बसाइका क्रममा उनले समकक्षी मुखर्जी, उपराष्ट्रपति हमिद अन्सारी, प्रधानमन्त्री नरेन्द्र मोदीलगायतसँग भेटवार्ता गर्ने कार्यक्रम छ । राष्ट्रपति भण्डारी आउँदो शुक्रबार स्वदेश फर्किनेछिन् ।
आउने दिनको विदा फिर्ता
राष्ट्रपति भारत जाने दिन सार्वजनिक विदा दिएको सरकारले फर्किने दिन शुक्रबारको विदा भने फिर्ता लिएको छ । आइतबार बसेको मन्त्री परिषद् बैठकले राष्ट्रपतिको भारत भ्रमण स्वीकृत गर्दै जाने र आउने दुवै दिन सार्वजनिक विदा दिने निर्णय गरेको थियो ।

ईआइसिटी नेपाल प्रालिद्धारा संचालित हाम्राकुरा डटकममा प्रकाशित कुनै पनि सामाग्री ईआइसिटी नेपालको पूर्व जानकारी विना हुवहु एवं आंशिक रुपमा समेत कपी गरि प्रकाशन गर्नु दण्डनीय छ। यस किसिमका कार्य गर्ने उपर ईआइसिटी नेपाल कानुनी उपचार खोज्न बाध्य हुने भएकाले सम्बन्धित सवैलाई सचेत हुन जानकारी गराइन्छ।

नयाँ