काठमाडौं । सडक निर्माणका लागि खनिएको खाल्डोमा जमेको पानीमा डुबेर रौतहटमा चार बालिकाको मृत्यु भएको छ । रौतहट गरुडा नगरपालिका वडा नम्बर–४ मा सडकमा बनेको खाल्डोमा डुबेर उनीहरुको मृत्यु भएको हो ।
१२ वर्षीया संगीताकुमारी साह, ९ वर्षीया सुनिता, ९ वर्षीया सुनैना, ९ वर्षीया सुस्मिताको मृत्यु भएको प्रहरीले जनाएको छ ।
गरुडादेखि पानीट्याङ्की जोड्ने निर्माणाधीन सडकमा बनेका खाल्डोमा उनीहरु डुबेका हुन् ।
उनीहरु एकै परिवारको दाजुभाइका छोरी हुन् । सुनैना जोगेन्द्र साहकी छोरी हुन् भने संगिता र सुनिता रामएकवाल र सुस्मिता प्रेमनारायणकी छोरी हुन् ।
विहान १० बजेतिर घास काट्न निस्किएका उनीहरु घर नआएपछी खोज्दै जाँदा पानीमा डुवेको अवस्थामा भेटिएको गरुडा प्रहरी कार्यालयका प्रहरी निरीक्षक केशव रेग्मीले जानकारी दिए । जमेको पानीमा पौडी खेल्ने क्रममा चार बालिकाको मृत्यु भएको हुनसक्ने प्रहरीको अनुमान छ ।
