काठमाडौं । स्पेनले भ्यालेन्सिया आइपुगेका सयौं आप्रवासीहरुलाई आफ्नो मुलुकमा शरण दिने भएको छ । आइतबार स्पेनले मेडिटेरियन सागरबाट उद्धार गरिएका छ सय ३० आप्रवासीहरुलाई शरण दिने तयारी गरेको हो ।
गएको साता लिबिया नजिकैबाट तीन एक्वारियल जहाजमा छ सय ३० आप्रवासीहरुलाई उद्धार गरिएको थियो । स्पेनले आप्रवासीहरुलाई स्वागतको लागि ब्यानरको पनि तयारी गरेको छ ।
यसलाई मुलुकका केही मन्त्रालयका अधिकारीहरुले पनि सहयोग गर्नेछन् । स्पेनको नयाँ समाजवादी सरकारले निःशुल्क स्वास्थ्यसेवा प्रदान गर्ने बताएको छ भने उनीहरुको रोगको विषयमा पनि परीक्षण गर्नेछ । स्पेनले मानव अधिकारको रक्षाको लागि उनीहरुलाई आफ्नो मुलुकमा शरण दिने निर्णय गरिएको जानकारी दिएको छ ।
स्पेनका प्रधानमन्त्री पेड्रो सान्चेजले आफ्नो पदभार ग्रहण गरेसँगै आप्रवासीमैत्री नियमको पक्षमा वकालत गर्दै आएका छन् । भ्यालेन्सियामा अहिले एक हजार रेडक्रसका कर्मचारीहरुले काम गरिरहेका छन् । उनीहरुले आप्रवासीहरुलाई सहयोग पुर्याइरहेका छन् । अधिकारीहरुका अनुसार अहिले उद्धार गरिएका आप्रवासहरुमा बालबालिकाका साथै केही गर्भवती महिलाहरु पनि रहेका छन् ।
इटालीमा शरण लिन पुगेका उनीहरुलाई इटालीमा नयाँ सरकार आएसँगै प्रवेश गर्न दिइएको थिएन । इटालीमा प्रवेश नपाएपछि उनीहरु स्पेनतर्फ लागेका थिए ।
इटालीका आन्तरिक मामिलामन्त्री आप्रवासीको मामिलामा निकै कठोर भएर लागेका छन् । स्पेनले पनि इटालीले उनीहरुलाई शरण दिनुपर्नेमा नदिएको बताएको छ ।
स्पेनले आप्रवासीहरुलाई मानव अधिकारको पूर्णरुपमा पालना गर्दै आफ्नो मुलुकमा शरण दिने निर्णय गरेको हो । यसअघि फ्रान्सका राष्ट्रपति एम्यानुअल म्याक्रोनले पनि इटालीको आप्रवासीहरुलाई शरण नदिने निर्णयको आलोचना गरेका थिए । इटालीले गैर जिम्मेवार बन्दै यस किसिमको निर्णय गरेको उनले भनाइ थियो ।
फ्रान्सको सरकारले स्पेनसँग आप्रवासीको मामिलामा वार्ता गरी सहकार्य गरेर अघि बढ्न तयार रहेको बताएको थियो । यस महिनाको अन्तिममा हुन गइरहेको ईयूको बैठकको लागि यो विषय सबैभन्दा महत्वपूर्ण मुद्दा हुनसक्ने बताइएको छ ।
