पक्राउ परेका एमाले वडा सदस्यसहित ७ जुवाडेलाई मुद्दा चलान

रामचन्द्र रायमाझी,

प्रकाशित २०७५ साउन ४ शुक्रबार

पाल्पा । तानसेनको शिलखानटोलबाट विहिबार जुवा खेल्दै गरेको अवस्थामा पाल्पा प्रहरीले पक्राउ परेका सात जुवाडेलाई मुद्दा चलान गरेको छ । शुक्रबार अध्ययन अनुसन्धानपछि जुवाडी ऐन अनुसार मुद्दा चलान गरिएको जिल्ला प्रहरी कार्यालयका सुचना अधिकृत विनोद घिमिरेले जानकारी दिए ।

तानसेन नगरपालिका–४शिलखानटोल स्थित सेन्चुरीहट रेष्टुरेण्डबाट प्रहरीले उनीहरुलाई पक्राउ गरेको हो । सूचना अधिकृत घिमिरेका अनुसार तानसेन ४ का कृष्ण थापा, गणेश कुवंर, प्रकाश कार्की, एमालेबाट निर्वाचित तानसेन नगरपालिका ११ का वडा सदस्य चुराबहादुर गोदार, तानसेन ३ का सुशिल कुवंर, तानसेन २ का टेकनाथ न्यौपाने र रिब्दीकोट ९ का शिब जिसीलाई तासको खालबाटै पक्राउ गरिएको हो ।

जुवा खेलिरहेको सूचना पाएपछि पुगेको प्रहरी टोलीले जुवा खालबाट एक लाख १५ हजार छ सय ९५ नगदसहित ३ थान तास बरामद गरेको छ । जिल्लाका विभिन्न स्थानहरुमा विगत देखिनै जुवा, लुडो खेल्दै आए पनि प्रहरी बेखबर बन्द जुवा तासले विकृतिको रुप लिएको थियो ।

पछिल्लो समयमा जिल्लामा जुवातास विकृतिका रुपमा फैलिन थालेपछि सर्वत्ररुपबाट प्रहरीको आलोचना हुन थालेपछि प्रहरीले जुवा खेल्नेहरुको खोजी कार्यलाई तीव्र पारेको छ । सामान्य सर्वसाधारण देखि जिल्लाका प्रतिष्ठीत व्यापारी, राजनैतिक दल, जनप्रतिनिधिहरु समेत जुवा खेलमा संलग्न रहेकै अवस्थामा प्रहरीले पक्राउन गरी कानूनी कावाही गर्न सफल भएको छ ।

पछिल्लो समयमा जिल्ला प्रहरीले समाजिक विकृती र विसंगतीका विरुद्धमा चालेको प्रभावकारी कदमको जिल्लावासीले प्रसंसा गरेका छन् ।