नेपालगञ्ज । नेपाली कांग्रेसका केन्द्रीय सदस्य प्रदीप पौडेलले सत्तासीन नेकपाका कार्यकर्ताहरुले नै अब प्रधानमन्त्री केपी ओलीको राजीनामा माग्ने ठोकुवा गरेका छन् । नेपालगञ्जमा सोमवार बिहान पत्रकारहसँगको भेटमा पौडेलले सरकारका पछिल्ला काम कार्वाहीका कारण नेकपाका कार्यकर्ताहरु नै रुष्ट भएकाले अब ओलीको राजीनामा निर्विकल्प रहेको बताएका हुन् । 

सरकारका पछिल्ला गतिविधिका कारण विश्व समुदाय माझ नै नेपालको छवि धमिलो भएको पौडेलको भनाइ थियो । चिकित्सा शिक्षा सुधारका लागि आन्दोलनरत डाक्टर गोविन्द केसीलाई राजधानीमा ल्याउन सरकारले जुम्लामा देखाएको ताडण्व नृत्यले जंगली युगको झल्को दिएको पौडेलको आरोप थियो । “माथेमा आयोगको प्रतिवेदनलाई तोडमोड गरेर वर्तमान सरकार केवल माफिया पोस्ने दाउमा लागेको छ” पौडेलले भने । 

तरुण दलको शान्तिपूर्ण प्रदर्शनमा बर्बर दमन गरी सरकारले शान्तिपूर्ण प्रदर्शन गर्न पाउने संविधान प्रदत्त हक छिनेको पौडेलले बताए । नेपाली नारीको अस्मितामा ठाडो प्रहार हुने गरी कानून मन्त्री शेरबहादुर तामाङबाट आएको निर्लज्ज अभिव्यक्तिको कडा शब्दमा भत्सर्ना गर्दै पौडेलले भने, “मन्त्री तामाङले माफी माग्नुको अब कुनै तूक छैन, उनले तुरुन्त पदबाटै राजीनामा दिनुपर्छ ।”

 विश्वविद्यालयका प्राध्यापकलाई छापामार शैलीमा विमानस्थलबाटै पक्राउ गर्ने, चिकित्सकलाई  अस्पतालबाटै अपहरण गर्ने, प्रश्न सोधेकै भरमा पत्रकारको जागिर खोस्ने, निषेधित क्षेत्र तोक्ने जस्ता काम गरेर वर्तमान सरकारले अधिनायकवादी चरित्र उदाङगो पारेको पौडेलले बताए । सस्तो लोकप्रियताका लागि यातायात तथा निर्माण क्षेत्रको सिण्डिकेट तोडेको बताउने वर्तमान सरकारले अन्तत सिण्डिकेट प्रणालीलाई नै बलियो बनाएको पौडेलको भनाइ थियो । 

समृद्धिको नारा दिएर नथाक्ने वर्तमान सरकारले अनावश्यक तरिकाले करको दायरा बढाई सबै क्षेत्रमा महंगी बढाएर आम जनताको ढाड सेक्ने काम गरेको पौडेलले बताए । 

फोहोरमैला व्यवस्थापन तथा जीर्ण सडक मर्मत गर्न नसक्ने सरकारले वर्षमा ४० लाख पर्यटक ल्याउँछु भन्नु हावादारी गफ सिवाय केही नभएको उनको भनाइ थियो ।