- सुन चाँदी दर
- विनिमय दर
- नेपाली पात्रो
- राशिफल
काठमाडौं । ‘सोल्टी’ र ‘मितिनी’ नाम गरको अर्को जोडी गैडा साउन मसान्तमा चीन पठाउने तयारी गरिएको छ । चीनलाई उपहार स्वरुप दिन लागेको दोस्रो जोडी गैँडामध्ये एकदेखि डेढ वर्ष उमेरको भालेको नाम सोल्टी र डेढदेखि दुई वर्षको पोथीको नाम मितिनी राखिएको छ ।
चितवन राष्ट्रिय निकुञ्जबाट चीन सरकारलाई उपहारस्वरुप यो जोडी गैडा पठाउन लागिएको हो । निकुञ्जका प्रमुख संरक्षण अधिकृत बेदकुमार ढकालका अनुसार चिनियाँ अधिकारीले साउन ३१ गते गैँडा लैजान तयारी थालेको बताए ।
यसअघि असार २८ गते एक जोडी गैँडा चीन पठाइ सकेको छ । ‘रुपसी’ र ‘भद्र’ नामका गैडालाई चीनको ग्वान्जाओस्थित पान्यु जिल्लामा रहेको चिमेलोङ सफारी पार्कमा राखिएको छ ।
बाटोका कारण यो पटक पनि दुई दिनअघि नै साउन २९ गते गैँडा काठमाडौं ल्याईदैछ । पहिलो जोडी गैँडा दुई दिनअघि नै काठमाडौँ ल्याएर राखिएको थियो ।
निकुञ्जबाट नियन्त्रणमा लिइएका गैँडा हाल सौराहास्थित राष्ट्रिय प्रकृति संरक्षण कोष परिसरमा खाल्टो खनेर (पिटबुमामा) राखिएको छ ।
यसअघि झैं पछिल्लो जोडी गैंडा पठाउदा निकुञ्जका चिकित्सक, प्राविधिक र सहयोगी पठाउने तयारी गरिएको छ । पहिलो जोडी गैँडा पठाउँदा सँगै गएका चिकित्सक र प्राविधिक भने फर्किसकेका छन् ।
दुई वर्षअघि प्रधानमन्त्री केपी शर्मा ओलीले चीन भ्रमणका क्रममा गैंडा उपहार दिने वचन दिएका थिए । त्यहि अनुरुप अहिले गैँडा पठाउन लागिएको हो ।
चीनमा दुई जोडी गैँडा पठाएपछि निकुञ्जबाट अहिले सम्म उपहारस्वरुप विभिन्न देशमा पठाइएका गैँडाको संख्या चीनलाई ४ सहित गरी ३० वटा पुग्ने भएको छ ।
बाह्र वर्षपछि यो बर्ष दुई जोडी गैँडा चीन पठाउने प्रक्रिया अघि बढेको हो । निकुञ्ज तथ्यांकअनुसार पहिलो पटक सन् १९८५ मा भारतको दुधुवामा चार गैँडा पठाइएको थियो । पछिल्लो पटक सन् २००६ मा अष्ट्रियामा एक जोडी गैँडा पठाइएको थियो ।
यसअघि गैँडा पठाएर भारत, म्यान्मार र थाइल्याण्डबाट हात्ती ल्याइएको थियो । निकुञ्जका पूर्वप्रमुख संरक्षण अधिकृत रामप्रीत यादवले गैँडा दिएर भारतबाट मात्र १६ हात्ती ल्याइएको जानकारी दिए ।
गैंडा हस्तान्तरणका लागि कुल एक करोड ५० लाख रुपैयाँ खर्च चीन सरकारले नै बेहोरेको राष्ट्रिय निकुञ्ज तथा वन्यजन्तु संरक्षण विभागले जनाएको छ ।