काठमाडौं । नेपाल प्रहरीभित्र अधिकारीहरु नै बदनामित हुन थालेपछि एकाएक अदलबदल भएको छ । प्रहरी अधिकारीहरु नै घुसकाण्डमा पक्राउ पर्न थालेपछि जिम्मेवारी हेरफेर गरिएको हो ।
प्रहरी प्रधान कार्यालयले उपत्यकाका तीन प्रहरी वृत्तको नेतृत्व परिवर्तन गरेको छ । महानगरीय प्रहरी वृत्त बौद्धका डीएसपी श्यामकुमार राई गत शनिबार घुस काण्डमा निलम्बनमा परेपछि डीएसपी नरेन्द्र चन्दलाई खटाइएको छ ।
डीएसपी चन्दको बौद्ध सरुवापछि यसअघि उनी कार्यरत रहेको महानगरीय प्रहरी परिसर ललितपुरमा विवादास्पद छविका अपिलराज बोहराको सरुवा भएको छ ।
त्यसैगरी थानकोटमा डीएसपी कुमार विक्रम थापालाई सरुवा गरिएको छ भने ललितपुरको सातदोबाटो वृत्तमा डीएसपी गौतम मिश्रलाई पठाईएको छ ।
थानकोटका डीएसपी नवरत्न पौडेल युएन मिशनमा जाने भएपछि थापालाई त्यहाँ पठाईएको हो ।
सातदोबाटोका डीएसपी विनोद सिलवाल प्रहरी प्रधान कार्यालयको अपराध अनुसन्धान विभागमा सरुवा भएपछि उक्त स्थानमा मिश्रलाई पठाईएको हो ।
गृहमन्त्री रामबहादुर थापा बादलले नै प्रमुखहरुलाई बोलाएर कडाइ गर्न निर्देशन दिएपछि प्रहरी अधिकारीहरु हेरफेर गरिएको हो । पछिल्ला केही घटनाहरुले गर्दा प्रहरी बदनामित हुँदै आएको छ ।
