नयाँ दिल्ली । भारतीय जनता पार्टी मध्यप्रदेशले काँग्रेसको चुनावी मान्यता खारेज गर्नको लागि माग गरेको छ । चुनाव आयोज जस्तो संवैधानिक निकायको अविश्वास गरेको आरोप लगाउँदै भाजपाले कारबाही स्वरुप मान्यता फिर्ता गर्नको लागि माग गरेको छ ।
प्रदेश स्तरीय अघिल्लो चुनावमा ६० लाख फर्जी भोटको विषयमा काँग्रेसले हालेको मुद्दामा चुनाव आयोगले सोही समय नै भाजपा दोषी नभएको ठहर गरेको थियो । तर, सो प्रतिवेदनको विरुद्ध नै काँग्रेस सर्वाेच्च अदालत गएको थियो ।
अदालतले पनि भाजपालाई निर्दाेष ठहर गरिदिएपछि भाजपा पनि काँग्रेस प्रति आक्रामक बन्न थालेको हो । भाजपाले यो चुनावमा यही मुद्दालाई प्रचारमा ल्याउने रणनीति पनि बनाएको छ । भाजपाले सर्वाेच्च अदालतको यो फैसलासँगै आधिकारिक प्रतिक्रिया जारी गर्दै यो सम्पूर्ण मध्यप्रदेशवासीहरुको जीत रहेको बताएको छ ।
प्रदेशका राज्यमन्त्री विश्वास सारंगले काँग्रेस प्रति आक्रामक अभिव्यक्त दिँदै भनेका छन् कि कांग्रेस लोकतन्त्रमा 'डर्टी ट्रिक्स' अपनाईरहेको छ । कांग्रेसले चुनाव आयोग जस्तो संवैधानिक संस्थाको अपमान गरेको आरोप पनि लगाएका छन् ।
