काठमाडौं । सत्ताधारी नेपाल कम्युष्टि पार्टी (नेकपा)ले आयोजना गरेको शुभकामना आदानप्रदान तथा चियापान कार्यक्रममा प्रमुख विपक्षी पार्टीका नेताहरु उल्लेख्य रुपमा सहभागि भएका छन् ।
प्रमुख विपक्षी कांग्रेस सभापति शेरबहादुर देउवा स्वयं चियापानमा सरिक भए । सरकारले जन अपेक्षा अनुसार काम गर्न नसकेको भनि आलोचना गरिरहेको विपक्षी पार्टीका नेताहरु चियापानमा भने उल्लेख्य रुपमा सहभागि भए ।
सभापति देउवाले नेकपाका अध्यक्ष पुष्पकमल दाहालसँग भेटघाट गरे । भने, अर्का अध्यक्ष तथा प्रधानमन्त्री केपी शर्मा ओली अस्वस्थ भएपछि चियापानमा सरिक हुन सकेनन् । ओलीलाई नदेखेपछि देउवा चियापानबाट चाँडै निस्किए । बाहिरिँदा सञ्चारमाध्यमलाई समेत प्रक्रिया दिएनन् ।
देउवासँगै कांग्रेसका अन्य पदाधिकारी तथा थुप्रै केन्द्रीय सदस्यहरु सहभागि भए । यस्तै, रामचन्द्र पौडेल तथा नेता कृष्ण सिटौला पक्षधर नेताहरु पनि चियापानमा देखिए ।
सिटौला पक्षधर नेता भिमसेनदास प्रधानले यो चियापानले सत्ताधारी र प्रतिपक्षबीचको संवादविहिनता हट्ने र यही चियापानबाट सत्ताधारी दलले सम्वृद्धिको अभियानमा विपक्षीको भूमिकालाई पनि मध्यनर गर्ने बताए । नेकपाका नेता जीवनराम श्रेष्ठले यो चियापानले मूख्य गरेर पार्टी एकताका बाँकी कामलाईं निष्कर्षमा लैजाने र विपक्षीहरुसँगको सम्बन्धमा पनि सुरधार आउने बताए ।
राष्ट्रिय सभाका अध्यक्ष गणेश तिमिल्सिनाले ‘यो संस्कृति हो । यसले सदुभाव बढाउँछ । यही चियापानबाट रिजल्ट खोज्ने होइन । विगतदेखि चलेको रित हो’ भने । उनले अगाडि भने, ‘बजेट आउँदा प्रतिपक्षीको मौन समर्थन रहयो, अहिले विभिन्न ऐन ल्याउँदा सर्वसहमतिले पारित गरेका छौँ, लोकतन्त्रमा यो भन्दा सून्दर पक्ष के हुन सक्छ ?’
