बारा । जिल्ला प्रहरी कार्यालय बाराको हिरासतमा रहेका दुई जना नेता मंगलबारदेखि आमरण अनसनमा बसेका छन् ।
कर्तव्य ज्यान मुद्दामा संलग्न रहेको आरोपमा तीन दिनअघि पक्राउ परेका पचरौता नगरपालिका घर भएका नेता प्रभुनाथ पटेल र जलन्धर सिंह आमरण अनसनमा बसेका हुन् ।
प्रहरीले आफूहरुलाई झूटो मुद्दामा फसाउन खोजेकोले त्यसको विरोध गर्दै आमरण अनसन सुरु गरेको सिंह र पटेलले बताएका छन् ।
नगरस्तरीय अस्पताल निर्माण गर्ने स्थानको विषयलाई लिएर गएको कात्तिक ५ गते नगरपालिका अन्तर्गतको बेल्दारी र पचरौता पिपरपाती टोलका स्थानीयबीच झडप हुँदा दुई दर्जन भन्दा बढी घाइते भएका थिए ।
झडपमा संलग्न रहेको आरोपमा प्रहरीले पटेल र सिंहलाई मंसिर २९ गते पक्राउ गरेको थियो । पक्राउ परेका पटेल कलैयास्थित रामराजा मावि शाह बहुमुखी क्याम्पसका सञ्चालक समितिका अध्यक्ष हुन् भने सिंह गएको स्थानीय तहको निर्वाचनमा नेकपा माओवादी केन्दंबाट पचरौता नगरपालिकाको प्रमुखमा उम्मेदवार बनेका थिए ।
जिल्ला प्रहरी कार्यालय बाराले मंगलबार दोश्रो पटक १० दिनको म्याद थप गर्न माग गरेकोमा जिल्ला अदालत बाराले थप चार दिनको म्याद थप गरेको अदालतले जनाएको छ ।
