उपत्यकामा बर्डफ्लुको संक्रमण, मरेका कुखुरा राम्रोसंग नष्ट नगर्दा कागमा सर्यो
प्रकाशित २०७५ चैत २३ शनिबार
455
Shares
काठमाडौं । काठमाडौं उपत्यकामा बर्डफ्लुको संक्रमण फैलिएको छ । चैतभरमा थुप्रै स्थानमा कुखुराहरु मारिएको छ भने पशुसेवा विभागका अनुसार काग तथा परेवा पनि मरेका छन् ।
विभागका अनुसार संक्रमणबाट ३५० काग मरिसकेका छन् । कतिपय स्थानमा विभागको पहुँचसमेत पुग्न सकेको छैन । काग मरेपछि गरिएको नमुना परीक्षणमा एच५एन१ संक्रमण भएको देखिएको विभागले जनाएको छ ।
परेवा फाटफुट मरे पनि तिनीहरुमा संक्रमण नै भने नदेखिएको विभागले जनाएको छ । निरन्तर कुखुरामा बर्डफ्लु देखिएपछि कुखुरा मारेर फालिएको थियो । तर राम्रोसंग कुखुरा नगाडिएकाले कागले खाएर सरेको हुन सक्ने अनुमान गरिएको छ ।
काठमाडौं, ललितपुर र भक्तपुरमा यो चैतमै हजारौं कुखुरा नष्ट भइसकेको छ ।
अझै पनि कुखुरा वसारपसारमा सरकारले रोक लगाउन सकेको छैन । त्यसैगरी उपत्यकाभित्रै कुखुराको प्रयोग पनि रोकिएको छैन ।
