बुटवल। रुपन्देहीको बुटवलस्थित सिद्धार्थ महिला तथा बाल अस्पताल (आम्दा)मा उपचारको क्रममा बालकको मृत्यु भएको छ । सोमबार साँझ बुटवल उपमहानगरपालिका ११ का नारायण दर्लामीका दश महिनाका छोरा ओमको मृत्यु भएको हो ।
समयमै चिकित्सव उपचारमा नआउँदा बालकको मृत्यु भएको आफन्तले आरोप लगाएका छन् । अस्पताल पुर्याएको एक घण्टामै बालकको मृत्यु भएको थियो ।
अस्पतालका चिकित्सक डा. सन्तोष पोखरेलले वान्ता सर्केर मृत्यु भएको हुन सक्ने बताए । उनले भने, ‘हामीले बिरामीलाई आउँदा वित्तिकै सिरिन्जबाट औषधि दिएका थियौं । तर, निमोनिया भएको बच्चा रहेछ । वान्ता गर्दा सर्केर हुन सक्छ । केही बच्चालाई वान्ता सर्किँदा त्यस्तो हुनु सक्छ ।’
बालकलाई आइतबार बुटवलस्थित लुम्बिनी प्रादेशिक अस्पताल पुर्याइएको थियो । अस्पतालले भैरहवास्थित मेडिकल कलेज रिफर गरेको थियो । मेडिकल कलेजले फेरि बालकलाई अम्दामा रिफर गरेको थियो ।
बालकका आफन्तले डा. सन्तोष पोखरेललाई एकपटक तिलोत्तमा हस्टिलमा देखाएर आम्दा लैजान सुझाव दिएपछि बालकलाई तिलोत्तमा हस्टिलमा चेक गराउँदा पोखरेलले अम्दामा लगेर भर्ना गर्न भनेपछि आम्दा पुर्याइएको थियो ।
इमर्जेन्सीमा पुर्याएको एक घण्टासम्म पनि चिकित्सक नाउँदा बालकको मृत्यु भएको बुबा नारायणले बताए । बालकका आफन्तले शव बुझ्न मानेका छैनन् । उनीहरूले समयमै डाक्टर नआउँदा बालकको ज्यान गएकाले घटनाको छानविन गर्न माग गरेका छन् । डा. पोखरेलले आफूहरूको कुनै गल्ती नभएको बताए ।
