बनियानी। राष्ट्रिय प्रजातन्त्र पार्टीका महामन्त्री राजेन्द्र लिङ्देनले आफूलाई ज्यान मार्ने धम्की आएको बताएका छन्। झापाको बिर्तामोडमा आज पत्रकार सम्मेलन गरी सांसद लिङ्देनले यही चैत ७ गतेदेखि आफूलाई निरन्तर ज्यान मार्ने धम्की आएको जिकिर गरे। “चैत ७ गतेदेखि निरन्तर मलाई थ्रेट आइरहेको थियो”, उनले भने, “कहिले शुभचिन्तक हुँ भन्दै म्यासेज आयो, कहिले तँलाई मार्ने मैले सुपारी लिएको छु भन्दै हिन्दी भाषामा भ्वाइस म्यासेज आयो।”
शुरुमा मोबाइल नं ९८४३९४०२९४ बाट ‘कोही तपाईंलाई मार्न चाहन्छ, तीन जना इण्डियन मान्छे आको थियो, अनि त्योसँग दुई जना नेपाली मान्छे आए र भेटे, शायद एउटा पुलिसजस्तो लाग्यो, अनि तीन जनासँग पेस्तोल पनि थियो, हिन्दीबाट कुरा गर्दै थिए, दुई जना नेपालीले २० लाख दिए, बाँकी ३० लाख काम भएपछि दिने भन्दै गए’ मेसेज(सन्देश) उद्धृत गर्दे लिङ्देनले बताए।
त्यसपछि मोबाइल नम्बर ९८१३५४४९२९ बाट ह्वाटसएपमा आफूलाई हिन्दी भाषामा ‘तुम्हे मार्नेका मुझे ५० लाख दिया गया है, २० लाख एडभान्स मिला है, बाँकी काम होनेके वाद मिलेगा’ भन्ने भ्वाइस म्यासेज आएको नेता लिङ्देनले बताए। ‘तँ राम्रो मान्छे रहेछस्, तँलाइ मारेँ भने मलाई अल्लाले पनि माफ गर्दैन, मैले मिसन छोडेँ, भारत फर्केँ”, अन्तिम भ्वाइस मेसेजबारेमा बताउँदै उनले भने, “त्यसपछि मेसेज आएन।”
घटनापछि आफूले प्रहरीसँग सम्पर्क गरेको प्रतिनिधिसभा सदस्य लिङ्देनले बताए। उनले भने, “प्रहरीको सिआइडीले घटनाको अनुसन्धान शुरु गरिरहेको छ, केही मान्छेलाई प्रहरीले पक्राउ परेको छ।” मोबाइल नं ९८१३५४४९२९ को कल डिटेल्सका आधारमा प्रहरीले झापाको केचनाकवल–२ बाट तिलकदास पराजुलीलाई पक्राउसमेत गरेको छ।
प्रहरीले उक्त नम्बरबाट आफूसहित झापालगायत स्थानका चार जनासँग कुराकानी भएको पत्ता लगाएको उनले बताए। “केही आपराधिक व्यक्ति र केही पार्टीभित्रकै व्यक्तिसँग पनि सम्पर्क भएको देखियो”, उनले भने, “पार्टीभित्रकै मान्छे घटनामा संलग्न भएको देखिएको छ।”
