दाङ । नेकपा क्रान्तिकारी माओवादीका महासचिव मोहन वैद्य किरणले अध्यक्षद्वय केपी शर्मा ओली र पुष्पकमल दहाल 'प्रचण्ड' नेतृत्वको नेपाल कम्युनिष्ट पार्टी (नेकपा) दक्षिणपन्थीको भासमा जाक्किएको आरोप लगाएका छन्। बुधबार दाङमा आयोजीत पत्रकार सम्मेलनमा उनले यस्तो बताएका हुन् ।
वैद्यले भने,‘नेकपा दक्षिणपन्थी पार्टी हो। नेकपा नाम नराखेको भए हुन्थ्यो, अलिक भ्रम पर्ने खालको भयो ।’
नेत्रविक्रम चन्द विप्लव नेतृत्वको पार्टीलाई अनावश्यक रुपमा ‘हाइलाइट’ गरेको टिप्पणी गरे। उनले विप्लवले राज्यविरुद्ध सशस्त्र संघर्ष होइन भन्दाभन्दै सरकारले अनावश्यक रुपमा हाइलाइट गरिरहेको बताए। वैद्यले भने,‘विप्लवजी आफैले स्वयं सशस्त्र संघर्ष होइन । प्रहरी र सेनामाथिको आक्रमण होइन भनिरहनु भएको छ। तर, राज्यले अनावश्यकरुपमा हाइलाइट गरिरहेको छ।’
उनले विप्लव नेतृत्वको पार्टीमाथि प्रतिबन्ध लगाउनु संविधान विपरित भएको बताए। ‘संविधानमा राजनीतिक दललाई प्रतिबन्ध लगाउने व्यवस्था कतै छैन,’उनले भने,‘ जति कुरा विप्लवजीले उठाएका छन् ती सबै राजनीतिक कुरा हुन् । उनलाई राज्यले राजनीतिक व्यवहार गर्नु पर्दथ्यो।’ उनले सीके राउतसँग रातारात वार्ता गर्ने सरकारले विप्लवसँग वार्ता गर्न खास ध्यान नदिएको टिप्पणी गरे। ‘वार्तामा बोलाउनका लागि मात्रै बोलाएर हुँदैन। सीके राउतसँग वार्ता गरे जसरी विप्लवसँग किन गरिएन,’उनले प्रश्न गरे। वैद्यले विप्लवमाथि दमन र यातना दिएर समस्याको समाधान नहुने बताए ।
उनले भने,‘विप्लव पक्षका कतिपय राजनीतिक, विचार र लाइनसँग हामी सहमत छैनौं। तर, त्यो राजनीतिक समूह हो। उहाँहरुसँग सरकारले राजनीतिक समूहका रुपमा वार्ता गर्नु पर्छ,’उनले भने,‘दमन गरेर, यातना दिएर समस्या समाधान हुँदैन, झन् बल्झाउँछ।’ फरक प्रसंगमा वैद्यले केपी शर्मा ओली नेतृत्वको वर्तमान सरकारले जनअपेक्षा अनुसार काम गर्न नसकेको बताए। ‘कम्युनिष्टको सरकार छ भन्ने कुरा त बाहिर छ। सरकारले समृद्धिको कुरा पनि गरिरहेको छ,’उनले भने,‘तर, समृद्ध नेपाल सुखी नेपालको नारा अनुसार सरकार अघि बढ्न सकेको छैन।’ जनताले अब दुई तिहाईको सरकार कसरी अघि बढ्छ भन्ने प्रश्न उठाउन थालेको वैद्यको भनाइ छ ।
