काठमाडौं । नेपाली कांग्रेसका युवा नेता एवम् केन्द्रीय सदस्य गगन थापाले शान्ति सुरक्षा दिन नसक्ने गृहमन्त्री रामबहादुर थापा बादललाई राजीनामा दिन सुझाव दिएका छन् ।
नेपाल प्रेस युनियनको २८औं स्थापना दिवसका अवसरमा काठमाडौंमा आयोजित कार्यक्रमलाई सम्बोधन गर्दै थापाले विप्लवको प्रवक्ता बन्ने गृहमन्त्रीलाई पदमा बस्ने अधिकार नरहेको बताए ।
‘हामीलाई सुरक्षा दिने गृहमन्त्री चाहिएको हो’, थापाले भने, ‘तर्साउने गृहमन्त्री चाहिएको होइन । शान्तिसुरक्षा दिन नसक्ने गृहमन्त्रीले आजै राजीनामा दिनुपर्छ ।’ विप्लवले जनसेना गठन गरेको र उपत्यकालाई केन्द्र बनाएको भन्ने गृहमन्त्रीको भनाइको थापाले आलोचना गरे ।
उनले विप्लवबारे यति जानकारी राख्दाराख्दै पनि किन सुरक्षा दिन नसकेको भन्दै प्रश्न गरेका थिए । कांग्रेसका युवा नेता थापाले कम्युनिस्ट सरकारले अधिनायकवादतर्फ जान लागेको बताए । ‘राजा ज्ञानेन्द्रलाई ठेगान लगायौं’, उनले भने, ‘अब राजा बन्न खोज्नेलाई रोक्ने तागत पनि हामीसँग छ ।’
युवा नेता थापाले त्यसका लागि कांग्रेसको सुदृढीकरण हुन जरुरी रहेको बताए । उनले आतंक, आपराधिक घटनाको पनि विरोध गरेका छन् । नेपाली कांग्रेसले शुरू गरेको जागरण अभियानको आलोचना गरेका युवा नेता थापाले महाधिवेशन गरेर नयाँ संविधानअनुसार कांग्रेसलाई व्यवस्थापन गर्नुपर्ने बताए ।
‘नयाँ संविधान कांग्रेसकै नेतृत्वमा बनायौँ’, उनले भने, ‘कांग्रेसलाई नयाँ संविधान संघीयताले चिन्दैन । अहिले अधिवेशन गरेर संविधानअनुसार कांग्रेसलाई ढाल्ने बेला जागरण अभियान चलाउनु ठीक होइन ।’
नेपाली कांग्रेसका युवा नेता थापाले नेत्रविक्रम चन्द ‘विप्लव’ नेतृत्वको नेकपाले शुरू गरेको हिंसाको राजनीतिलाई कुनै पनि हालतमा स्वीकार गर्न नसक्ने बताएका छन् । उनले विप्लवलाई हिंसाको राजनीति त्याग गरेर शान्तिपूर्ण राजनीतिमा आउन सुझाव दिएका छन् ।
कार्यक्रममा नेताहरू बोल्दै गर्दा हल खाली थियो । गगनको बोल्ने पालो आएपछि हल खचाखच भरिएको थियो । गगनले बोल्दै गर्दा हलमा सन्नाटा छाएको थियो । सबैले गगनको सम्बोधनलाई ध्यानपूर्वक सुनेका थिए ।
