काठमाडौं । नेपाली कांग्रेसले सांसद ज्ञानकुमारी छन्त्यालप्रति सम्मान प्रकट गर्दै  बिहिबार पार्टी केन्द्रीय कार्यालय बन्द गर्ने निर्णय गरेको छ ।

सभापति शेरबहादुर देउवाको अध्यक्षतामा बुधबार भएको पार्टी केन्द्रीय समितिको बैठकले सांसद ज्ञानकुमारी छन्त्यालमा शोक प्रस्ताव पारित गर्दै यस्तो निर्णय गरेको हो । 

पार्टीले बिहिबार पार्टी केन्द्रीय कार्यालय बन्द गर्नाका साथै केन्द्रीय कार्यालयमा पार्टीको झण्डा आधा झुकाइने तथा कुनै पनि औपचारिक कार्यक्रम नहुने बताएको छ । 

बैठकले प्रतिनिधिसभा सदस्य ज्ञानकुमारी छन्त्यालको बुधबार बिहान बाँसबारीस्थित शहीद गङ्गालाल हृदय रोग केन्द्रमा उपचारका क्रममा असामयिक निधन भएकामा शोकाकूल परिवारजनमा समवेदना व्यक्त गरेको छ ।  

उनको निधनबाट पार्टीले एक निष्ठावान् एवं कुशल महिला नेत्रीलाई गुमाएको र त्यसबाट पार्टीलाई अपूरणीय क्षति भएको बताउँदै सभापति देउवाले  पार्टी र आफ्नातर्फबाट श्रद्धाञ्जली अर्पण गरेका छन् । 

यसैबीच कांग्रेस संसदीय दलले प्रतिनिधिसभा सदस्य एवं पार्टीकी नेत्री ज्ञानकुमारी छन्त्यालको निधनप्रति दुःख व्यक्त गरेको छ । उनको बुधबार बिहान बाँसबारीस्थित शहीद गङ्गालाल हृदय रोग केन्द्रमा उपचारको क्रममा निधन भएको हो ।

कांग्रेस प्रमुख सचेतक बालकृष्ण खाँणले बुधबार शोक विज्ञप्तिमार्फत उनको आत्माको चीरशान्तिको कामना गर्दै शोक सन्तप्त परिवारजनमा समवेदना प्रकट गरेका छन्।

 विसं २०१४ मा बागलुङ साविकको खुङ्खानी–२ हाल तमानखोला–५ मा जन्मएकी नेत्री छन्त्याल विसं २०७० को संविधानसभा निर्वाचनमा बागलुङ क्षेत्र नं–३ बाट प्रत्यक्ष निर्वाचित भएकी थिइन् । उन विसं २०७४ मा कांग्रेसबाट समानुपातिक समावेशी प्रणालीबाट निर्वाचित भई प्रतिनिधिसभा सदस्य भएकी हुन् ।

विसं २०४६ बाट कांग्रेसमा आवद्ध भई राजनीतिक यात्रा शुरु गरेकी स्व छन्त्यालले नेपाल महिला सङ्घको जिल्ला अध्यक्ष, कांग्रेस जिल्ला कार्यसमिति सदस्य, सल्लाहकारलगायत पार्टीको विभिन्न तहमा रहेर पार्टी सङ्गठनमा महत्वपूर्ण योगदान निर्वाह गरेको संसदीय दलको कार्यालयले जनाएको छ । उन कांग्रेसको महाधिवेशन प्रतिनिधि र महासमिति सदस्य थिइन् ।

स्व छन्त्याल लोकतान्त्रिक आन्दोलनका एक अथक योद्धा थिइन्  । उनले लोकतन्त्र स्थापनाका लागि भएका आन्दोलनमा सदैव अग्रपङ्क्तिमा रहेर महत्वपूर्ण भूमिका निर्वाह गरेकी थिइन्। छन्त्याल राजनीतिक क्षेत्रमा मात्र नभएर सामाजिक क्षेत्र र ग्रामीण विकासका कार्यमा सक्रिय रहँदै आएकी थिइन् । उनको निधनले राष्ट्र र कांग्रेसलाई अपूरणीय क्षति पुगेको प्रमुख सचेतक खाँणले उल्लेख गरेका छन् ।