काठमाडौं। विवेकशील नेपाली दलको अभियान विभागले काठमाडौँको विभिन्न स्थानमा सचेतनामूलक अभियान तथा मास्क वितरण अभियान गरिरहेको छ । राजधानीका धेरै भिडभाड हुने ठाउँमा मास्क वितरण गर्दै कोरोनाविरुद्धको सचेतना कार्यक्रम गरेको दलकी नेतृ रजिया बानुले बताइन् ।

‘पहिलो दिन र दोस्रो दिन काठमाडौँको चाबहिल गणेश मन्दिर, तरकारी बजार वरिपरि क्षेत्रमा मास्क वितरण तथा कोरोना सँग सम्बन्धित सचेतनामूलक कार्यक्रम गरेका थियौँ’-अभियान विभागकी उपप्रमुख समेत रहेकी नेतृ बानुले भनिन् । तेस्रो दिन लगनखेल तथा चौथो दिन शुक्रबार पाटन क्षेत्रमा कार्यक्रम गरिएको थियो । मास्क वितरण सँगै ‘मास्क लगाउनुहोस् कोरोनाले चिन्ला’, ‘तरकारी लैजानुहोस्, कोरोना नलैजानुहोस्’, ‘कृष्णजीको आशीर्वाद लिनुहोस्, कोरोनाबाट बच्न मास्क लाउनुहोस्’ जस्ता सन्देश हरू उल्लेखित प्लेकार्ड प्रदर्शन समेत गरिएको थियो । 

कोभिडकै कारण भिडभाड कम गर्न तीन-चार जनाको सङ्ख्यामा उभिएर मास्क बाँड्ने र स्यानिटाइजर तथा साबुनपानिले हातको सफाइ बारे सन्देश दिँदा उत्साही भएर अभियानलाई निरन्तरता दिएको दलले जनाएको छ । अभियन्ताहरूले तरकारी बजारका पसलेहरूलाई समेत मास्क वितरण गर्ने र प्रयोग गर्न सन्देश दिने गरेका छन् । अत्यधिक भिडभाड हुने क्षेत्रमा मानिसहरू मास्क लगाउन बिर्सिने तथा आफन्त या पसलेसँगको संवादमा मास्क फुकाल्ने गरेकाले ती क्षेत्रहरूमा सचेतना बढाइएको विवेकशील नेपाली दलले जनाएको छ ।

यी अभियानहरुलाई स्थानीय नागरिकहरुले समेत साथ दिएका थिए। जहाँ जहाँ अभियान भयो, त्यहाँ नागरिकहरुले धन्यवाद दिएको र नागरिकहरु आफैलाई अभियान गर्न प्रेरित गरेको कुरा समेत दलले बताएको छ।

महामारीको समयमा देखिएको बेला भ्रष्टाचार, अनियमितता, अव्यवस्था तथा रणनीतिक कमजोरी विरुद्ध आवाज पनि उठाउने र सामाजिक उत्तरदायित्व अनुरूप सामाजिक सचेतना र जागरणमा लाग्ने दलको नीति अनुरूप कार्यक्रम गरिरहेको विवेकशीलका अध्यक्ष मिलन पाण्डेले बताए ।