प्रधानमन्त्री ज्यू ! अदालतलाई प्रभावमा नपार्नुहोस, नधम्क्याउनुहोस : प्रवक्ता शर्मा

प्रकाशित २०७७ माघ ३ शनिबार

भक्तपुर । नेपाली कांग्रेसका प्रवक्ता विश्वप्रकाश शर्माले प्रधानमन्त्री केपी शर्मा ओलीले जनतालाई सपनाको भ्रम मात्र छरेको आरोप लगाएका छन् ।

कांग्रेस मध्यपुर थिमि नगर कार्य समितिले आयोजना गरेको विरोधसभालाई सम्बोधन गर्दै शर्माले नेपाली युवाहरुले विकास र लोकतन्त्र चाहेकाले सो को बाटो कांग्रेसले मात्र बोकेर हिडिरहेको जिकिर गरे । उनले भने, ‘कम्युनिष्ट दर्शनको बाटो भनेको विकास र लोकतन्त्रको होइन । त्यसैले तमाम युवाहरु लोकतन्त्रको बाटोमा आउनुपर्छ ।’

अघिल्लो चुनावमा कांग्रेस हारेर राम्रो भएको बताउँदै नेता शर्माले कम्युनिष्ट सरकारलाई लोकतन्त्रको बाटोमा ल्याउन कांग्रेसले प्रयास गरिरहेको पनि बताए । उनले भने,‘ कम्युनिष्ट सरकारले सर्वहारा बर्गको नभइ भ्रष्टाचारलाई संस्थागत गर्नेमात्र काम गरेको छ ।’
प्रवक्ता शर्माले कम्युनिष्ट सरकार अहिले हामीले परेर भोगिरहेको उल्लेख गर्दै भने, शुसासन कायम गर्न र भ्रष्टाचार अन्त्य गर्न कम्युनिष्ट सरकार असफल भयो ।’

प्रधानमन्त्री केपी शर्मा ओली यतिबेला खोप किन्न भन्दापनि भोट गराउन खर्च गर्न उद्धत रहेको जनाउँदै प्रवक्ता शर्माले भने,‘अदालतलाई प्रभावमा नपार्नुहोस, नधम्क्याउनुहोस ।'