ब्रजिलमा २४ घण्टाभित्र एक हजारभन्दा बढी संक्रमितको मृत्यु

प्रकाशित २०७७ माघ ४ आइतबार

ब्राजिल । ब्राजिलमा विगत २४ घण्टामा कोभिड–१९ संक्रमित एक हजार ५० व्यक्तिको मृत्यु भएको स्वास्थ्य मन्त्रालयले आइतबार जनाएको छ । योसँगै ब्राजिलभरि अहिलेसम्म दुई लाख नौ हजार २९६ कोभिड–१९ संक्रमितको मृत्यु भएको छ ।

उक्त समयमा देशभर ६१ हजार ५६७ नयाँ व्यक्तिमा कोभिड संक्रमण भएको पुष्टि गरिएको छ । अहिलेसम्म ब्राजिलमा कूल संक्रमित भएकाको सङ्ख्या ८४ लाख ५५ हजार ५९ व्यक्ति कोभिड–१९ संक्रमित बनेका छन् ।

एमेजनको राजधानी मानौसस्थित अस्पतालहरूमा विरामीको भार बढ्दै गएपछि विहीबारबाट मेडिकल प्रणालीमा नै चुनौती थपिएको छ । उक्त सहरमा अक्सिजनको अभाव भएको बताइएको छ । अस्पतालमा अक्सिजनको अभाव भई विरामीहरूको सेवामा समस्या भएको भन्दै उनीहरूका परिवारका सदस्य तथा आफन्तहरू सडकमा निस्केर अक्सिजन अभावलाई हल गर्न माग गरिरहेका छन् ।

रक्षा मन्त्रालयले आइतबार एक विज्ञप्ति जारी गरी सी–१३० हेर्कुल्समार्फत् १३ ट्याङ्कर अक्सिजन मानौसमा पठाएको जनाएको छ । स्थानीय अस्पतालमा शैया नभएपछि उक्त सहरका विरामीलाई अन्यत्र लाने व्यवस्था भइरहेको पनि बताइएको छ ।