काठमाडौं । एक बेहुली जसले हुनेवाला श्रीमानको पैसा लुटेर भागिन् भन्ने पढ्दा कस्तो लाग्ला । भारतको लखनउमा त्यस्तै भएको छ । एक लुटेरी बेहुलीले विवाह हुनुअघि हुनेवाला बेहुलाको लाखौं रुपैयाँ खर्च गराएर फरार भएकी छिन् ।
गत १६ डिसेम्बरमा एक युवकको विवाह हुनुपर्ने थियो । तर बिहेको फेरो लाग्नुअघि नै बेहुलीले बेहुलाको सम्पत्ति लुटेर भागेकी छिन् ।
मनोज अग्रवाल नामका ती युवकको मेट्रोमोनियल वेबसाइट जीवनसाथी डटकम मार्फत एक युवतीसँग चिनजान भयो । चिनजान बिहेसम्म पुग्यो ।
गत अगष्ट १५ मा मनोजले आफ्नो प्रोफाइल उक्त साइटमा छाडेका थिए । प्रियंका सिंहसँग सम्पर्क जोडिएपछि कुराकानी अगाडि बढ्यो । आफू बिहारकी भएको बताउने प्रियंकाले बाबुआमाको मृत्यु भइसकेको बताएकी थिइन् ।
आइएएसमा चयन हुने बहानामा प्रियंकाले पैसा माग्न सुरु गर्न थालिन् । पढाइका लागि १० हजारदेखि ५० हजार माग्दै गइन् ।
प्रेममा दृष्टि गुमाएका मनोजले भावी पत्नीका लागि भन्दै लगानी गर्दै गए । घर बनाउने तयारी गरिरहेका मनोजले ६ लाख भारु ती युवतीलाई दिए ।
दुवै बीच ६ महिनादेखि ह्वाट्सएपमा कुराकानी हुँदै आएको थियो । तर १६ डिसेम्बरमा बिहे तय हुँदा लखनउ आउने जाने हवाई टिकट पनि मनोजले नै दिए ।
शपिङ मलमा लगेर दुई लाख भारुको शपिङ पनि गराए । अन्ततः हैदराबाद जाने भनी मनोजलाई झुक्याएर युवती फरार भइन् ।
फरार भएपछि प्रियंकाको मात्र हैन उनकी कथित आन्टीको फोन पनि बन्द भएको मनोजले बताए । मनोजले प्रियंकाले दिएका आधार कार्ड, प्यान कार्ड र मतदाता परिचयपत्र पनि नक्कली निस्केको बताए ।
