-
-
-
-
काठमाडौं । नाइजरमा सशस्त्र समूहले कम्तीमा ५८ जना सर्वसाधारणको हत्या गरेको छ । साप्ताहिक बजारबाट फर्किने क्रममा बन्दुकधारीहरुले मालीको सीमा नजिकै ती सर्वसाधारणको हत्या गरेको बीबीसीले लेखेको छ ।
बन्दुकधारीहरुले तिल्लाबेरी क्षेत्रमा बजारबाट फर्किँदै गरेका सर्वसाधारण सवार चार वटा सवारी साधनमाथि अन्धाधुन्ध गोली चलाएका थिए ।
नाइजरका सरकारी प्रवक्ता अब्दुरेहम जाकारियाले घटनाको पुष्टि गर्दै तीन दिने राष्ट्रिय शोकको घोषणा गरेका छन् । कुनै पनि समूहले घटनाको जिम्मेवारी लिएको छैन ।
सोमबार पनि सरकारी सेनासँग विद्रोहीहरुको माली र बुर्किन फासोको सीमा नजिकै दोहोरो भिडन्त भएको थियो ।
सो क्षेत्रमा अलकायदासँग नजिक रहेको विद्रोही समूहका गतिविधि सक्रिय रहेको अधिकारीहरुले जनाएका छन् ।
आक्रमणकारीहरुले गत जनवरी २ मा टिल्लेबमरीका २ गाउँमा आक्रमण गरेर कम्तिमा एक सय जना सर्वसाधारणको हत्या गरेका थिए ।
