काठमाडौं । पाकिस्तानी इमरान खान नेतृत्वको सरकारले भारतबाट लैजाने भनिएको कपास र चिनी नलैजाने बताएको छ । बुधबार मात्रै पाकिस्तानी आर्थिक समन्वयय समिति (इसीसी) ले भारतबाट कपास र चिनी मगाउने प्रस्तावलाई मन्जुरी दिएको थियो । तर त्यसलाई इमरान सरकारले खारेज गरिदिएको छ । इसीसीले बुधबार भारतबाट चिनी, कपास र धागो मगाउने घोषणा गरेको थियो ।
पाकिस्तानको मानवअधिकार मामिला मन्त्री शिरिन माजरीका अनुसार इमरान खानले भारतसँगको सम्बन्ध तब सामान्य हुनेछ जब धारा ३७० अनुसार जम्मू–कश्मीरलाई दिएको खास दर्जा बहाली हुन्छ ।
पाकिस्तानी वित्तमन्त्री हम्माद अजहरको अध्यक्षतामा भएको इसीसीको बैठकपछि पत्रकार सम्मेलनमा भारतबाट आयात गर्ने सामानको घोषणा गरिएको थियो ।
उनका अनुसार भारतबाट ५ लाख टन चिनी मगाउने प्रस्ताव स्वीकृत भएको थियो । त्यस्तै कपास आयात गर्ने प्रतिबन्धलाई जृुन महिनासम्म हटाउने निर्णय पनि भएको थियो ।
भारतको चिनी अन्य देशको तुलनामा २५ देखि ३२ रुपैयाँ (नेरु) सम्म सस्तो पर्दछ ।
तर उक्त निर्णयमाथि पाकिस्तानमा राजनीति शुरु भएको छ । चिनी भारतबाट मगाउने निर्णयले पाकिस्तान सरकारले विपक्षीबाट कडा आलोचना खेप्नु पर्यो । पाकिस्तन मुस्लिम लिगले यो निर्णयले इमरान सरकारले कडा मूल्य चुकाउनु पर्ने बताएको छ ।
अन्य देशबाट चिनी मगाउँदा महंगो पर्नेछ । (एजेन्सीको सहयोगमा)
