-
-
-
-
काठमाडौं । भारतको हरिद्धारमा चलेको कुम्भमेलामा सहभागी भएका कम्तीमा २ हजार १६७ जना कोरोना भाइरस संक्रमित भएका छन् । जसमा ३० साधु पनि संक्रमित भएका छन् । एक साधुको ज्यान गएको छ ।
मिडिया रिपोर्टसका अनुसार पछिल्लो १० दिनमा करिब ७० प्रमुख सन्तहरुको कोरोना रिपोर्ट पोजेटिभ आएको छ । उत्तर प्रदेशका मुख्यमन्त्री योगी आदित्यनाथ र पूर्व मुख्यमन्त्री पनि संक्रमित भएका छन् ।
हरिद्धारको कनखल इलाकामा १० हजार सन्त र उनका समर्थकहरु रहेकामा त्यहाँ शुक्रबार सेनिटाइज गरिने भएको छ ।
कोरोनाका कारण कुम्भमेला यो वर्ष जनवरी १ को सट्टा अप्रिल १ तारिखदेखि शुरु भएको थियो । एक महिनासम्म गर्ने भनिएको मेला कोरोनाका कारण १५ दिनमै सकिएको घोषणा गरिएको छ ।
केन्द्र सरकारले मेलाको समय घटाउने बताए पनि हरिद्धारका डीएम र कुम्भमेला अफिसर दीपक रावतले मेलाको समय घटाउने जानकारी नआएको बताउँछन् ।
अप्रिल १७ देखि पीसीआर परीक्षण बढाउने बताइएको छ ।
गत बुधबारको शाही स्नानमा १४ लाख भक्तजन सामेल भएका थिए । बुधबार नै महामंडलेश्वर कपिल देवको ज्यान गएको थियो । उनी ज्यान गुमाउने ठूला सन्त थिए ।
सरकारले कोभिड १९ को गाइडलाइनलाई पनि गम्भीरतापूर्वक पालना गर्न आग्रह गर्दा गर्दै कुम्भमेलामा कोराना तीव्र रुपले फैलिएको हो ।
त्यहाँ कोही पनि स्वास्थ्य मापदण्ड पालना गरेका पाइएका थिएनन् । कसैको पनि मुखमा मास्क थिएन भने भौतिक दूरी पालना सम्भव नै थिएन ।
संक्रमित अझै बढेका हुने आशंका गरिएको छ ।
