कपिलवस्तुमा बस र ट्रक ठोक्किँदा चालकको मृत्यु, २४ बढी घाइते

हाम्रा कुरा

प्रकाशित २०७८ वैशाख ७ मंगलबार

कपिलवस्तु । कपिलवस्तुको बुद्ध भूमि नगरपालिका वडा नं. ९ सुगरवरवामा भएको सवारी दुर्घटनाका घाइते मध्ये एक जनाको मृत्यु भएको छ ।

उपचारका लागि बुटवल पठाइएका बाणगंगा नगरपालिका २ का २७ वर्षका बस चालक कृष्ण कुँवरको मृत्यु भएको जिल्ला ट्राफिक प्रहरी कार्यालय कपिलवस्तुले बताएको छ ।

दुर्घटनामा परि २४ जना भन्दा बढी घाइते भएका छन् । जसमा रुपन्देही सैनामैना ३ का ४५ वर्षका ट्रक चालक नारायण चौधरी, बसका यात्रु बुद्ध भूमि ४ का सावित्री कुँवर, सोही ठाउँका सुमित्रा कुमाल, बुद्ध भूमि २ का मुसे थारु र बाणगंगा ८ का बस धनी विष्णु बन्जाडेको अवस्था गम्भीर रहेको प्रहरीले जनाएको छ ।

बुटवलबाट कृष्ण नगर तर्फ जाँदै गरेको लु १ ख ५६८४ नम्बरको यात्रु वाहक बस र विपरीत दिशाबाट आउँदै गरेको ना ४ ख ३०१२ नम्बरको मालवाहक ट्रक मङ्गलवार बिहान साढे १० बजे तिर ठोक्किएको थियो ।