काठमाडौं । पेरिस ओलम्पिक महिला फुटबल अन्तर्गत एसिया छनोटको पहिलो चरणको दोस्रो खेलमा नेपालले आज भियतनामसँग प्रतिस्पर्धा गर्दैछ ।
त्रिपुरेश्वरस्थित दशरथ रंगशालामा घरेलु टोली नेपालले बलियो राष्ट्र भियतनामसँग खेल्नेछ । नेपाल र भियतनामबीचको खेल साँझ ६ बजे शुरु हुनेछ ।
नेपाल आज भियतनामलाई हराउने योजनामा हुनेछ । तर भियतनामलाई हराउँन सहज हुनेछैन । भियतनाम पनि नेपाललाई दोस्रो खेलमासमेत हराउन चाहन्छ । भियतनाम नेपाललाई हराएर दोस्रो चरणमा पुग्न चाहन्छ ।
दशरथ रंगशालामै भएको पहिलो खेलमा नेपाललाई भियतनामले ५–१ गोल अन्तरले हराएको थियो । भियतनाम आज उक्त जितलाई कायम राख्न चाहन्छ ।
यता नेपाल भने पहिलो खेलमा व्यहोरेको हारको बदला लिन चाहन्छ । नेपालका मुख्य प्रशिक्षक अनन्त राज थापाले दोसो खेलमा पहिलो खेलमा गरेको गल्तीहरु सुधार गर्ने बताएका थिए ।
छनोटको समूह सी मा नेपाल र भियतनामले मात्र प्रतिस्पर्धा गरिरहेको छ । प्यालेस्टाइन र अफगानिस्तानले नाम फिर्ता लिएपछि यस समूहमा नेपाल र भियतनाम मात्र रहेको हो ।
समग्रमा शीर्ष स्थानमा टोलीले यस समूहबाट दोस्रो चरणमा स्थान बनाउने छ । नेपाललाई शीर्ष स्थानमा रहन भियतनाममाथि कम्तीमा पाँच गोलको अन्तरले हराउनु पर्ने हुन्छ ।
नेपालका लागि पहिलो खेलमा साबित्रा भण्डारीले गोल गरेकी थिइन् । उनले साफ जित्ने लक्ष्य बनाएर ओलम्पिकमा जान नसकिने बताएकी थिइन् ।
