काठमाडौँ। वीर अस्पतालले अक्सिजन अभावका कारणले नयाँ भवन सञ्चालन गर्न सकेको छैन। सरकारले अस्पतालको नयाँ सर्जिकल भवनमा कोभिड–१९ का सङ्क्रमितको उपचारका लागि सञ्चालन गर्ने निर्णय गरे तापनि अक्सिजन अभावले सञ्चालनमा कठिनाइ भएको छ।
अस्पतालका निर्देशक डा शान्ता सापकोटाले सरकारको निर्देशानुसार नयाँ भवन सञ्चालनका लागि तयारी गरिए तापनि अक्सिजन नपाइएपछि सञ्चालन हुन नसकेको बताए। नेपालमा अहिले १५ हजार अक्सिजन सिलिन्डरको माग र सात हजार २०० मात्र उत्पादन हुने गरेको छ। “हामीले भवनमा बिरामी राख्नका लागि सबै तयारी पूरा गरेका थियौँ तर अक्सिजन नभएपछि त्यही रोकिएको छ ”, उनले भने, “ अहिले सङ्क्रमितलाई अक्सिजन चाहिन्छ। त्यसैले अक्सिजनविना बिरामीलाई नयाँ भवनमा राख्न सकिँदै।”
सुरुमा एक सयदेखि ३०० शय्या सञ्चालन गर्ने योजना थियो। सर्जिकल बिरामीका लागि बनाइएको उक्त भवन ५०० शय्याको छ। त्यहाँ बिरामी राखेर उपचार गर्नका लागि कम्तीमा ६०० सिलिन्डर अक्सिजन आवश्यक रहेको उनको भनाइ छ। उनले अक्सिजनको आपूर्ति गर्नका लागि प्रयास भइरहेको र प्राप्त हुनासाथ भवनमा बिरामीलाई राखिने जानकारी दिए।
