संसद् विघटन विरुद्ध काँग्रेस : कानुनी र राजनीतिक लडाइ लड्ने

हाम्रा कुरा

प्रकाशित २०७८ जेठ ८ शनिबार

काठमाडौँ। संसद् विघटनको निर्णयका विरुद्ध प्रमुख प्रतिपक्षी दल नेपाली काँग्रेसले प्रतिवादमा उत्रने निर्णय गरेको छ। काँग्रेसको शनिवार बिहान सभापति शेरबहादुर देउवाको निवासमा बसेको पदाधिकारी बैठकले संसद् विघटनविरुद्ध कानुनी र राजनीतिक लडाइँ लड्ने निर्णय गरेको हो।

काँग्रेस सह महामन्त्री डा. प्रकाश सरण महतले काँग्रेस सशक्त रूपमा संसद् विघटनको प्रतिवादमा उत्रने र कानुनी तथा राजनीतिक लडाइँ लड्ने बताए।
‘राष्ट्रपति र प्रधानमन्त्री मिले संविधान नै सिद्ध्याउने नियतले अघि बढे अब काँग्रेस कानुनी र राजनीतिक लडाइको बाटोबाट अघि बढ्छ, बैठकको निर्णय उही हो,’ काँग्रेस सह महामन्त्री डा. महतले हाम्रा कुरासँग भने ।

पदाधिकारी बैठकमार्फत काँग्रेसले संसद् विघटनको विरोधमा उत्रन नागरिक समाजलाई आह्वानसमेत गरेको छ। बैठकले लोकतन्त्र खतरामा परेको निष्कर्षसहित संविधान र लोकतन्त्रका पक्षमा उभिन आह्वान गरेको हो।

बैठकले सभापति शेरबहादुर देउवाले बहुमत सांसदहरूको हस्ताक्षरसहित प्रधानमन्त्रीमा दाबी गर्दागर्दै पनि दाबी नपुगेको भनेर संसद् विघटन गर्नु अलोकतान्त्रिक र षडयन्त्रपूर्ण भएको काँग्रेसले भनेको छ।

काँग्रेसले अन्य विपक्ष नामा रहेका दलहरू सँगसमेत सहकार्य गरेर संसद् विघटन विरुद्ध लड्ने निर्णय लिएको हो ।