विश्व स्वास्थ्य सङ्गठनले भन्यो- 'नेपालमा कोभिड१९ को नयाँ भेरिअन्ट फेला परेको थाहा छैन'
नेपालमा हाल सक्रिय रहेको भेरिअन्ट 'डेल्टा' (B.1.617.2)
हाम्रा कुरा
प्रकाशित २०७८ जेठ २० बिहिबार
397
Shares
काठमाडौं। बेलायती सञ्चारमाध्यम डेलीमेलले कोभिड१९ को नेपाली भेरिअन्ट फेला परेको समाचार प्रकाशन गरेको थियो । कोरोना भाइरसका थुप्रै नयाँ भेरिअन्टहरु फेला परिरहेका बेला डेलीमेलको यो समाचारले विश्वकै ध्यान केन्द्रित गर्नपुग्याे ।
यद्यपि, विश्व स्वास्थ्य सङ्गठन (डब्लुएचओ)ले भने नेपालमा काेभिड१९काे नयाँ अथवा छुट्टै भेरिअन्ट फेला परेको थाहा नभएको बताएको छ । नेपालमा हालसम्म सुरुमा बेलायतमा भेटिएको भेरिअन्ट अल्फा र भारतमा देखिएका दुई भेरिअन्ट डेल्टा र कापा मात्रै फेला परेको आफूलाई जानकारी भएको बताएको हो ।
यी तीन भेरिअन्ट मध्ये हाल नेपालमा डेल्टा भेरिअन्ट सक्रिय रहेको समेत डब्लुएचओले जनाएको छ । बेलायती सञ्चारमाध्यमले उल्लेख गरे अनुसारको अन्य कुनै भेरिअन्ट नेपालमा देखिएकोबारे जानकारी नभएको डब्लुएचओको नेपाल स्थित कार्यालयले जानकारी दिएको हो ।
डब्लुएचओको नेपाल स्थित कार्यालयले भनेको छ, "नेपालमा सार्स-कोभ-२ को नयाँ भेरिअन्ट फेला परेको भन्ने कुरामा विश्व स्वास्थ्य सङ्गठन अवगत छैन । नेपालमा रहेका भेरिअन्टहरु Alpha (B.1.1.7), Delta (B.1.617.2) र Kappa (B.1.617.1) हुन् । यी तीन मध्ये नेपालमा हाल सक्रिय रहेको भेरिअन्ट Delta (B.1.617.2) हो ।"
