खुवालुङ ढुंगालाई सरकारले क्रेन लगाएर फुटाउँदैन, संरक्षण गर्छ : मन्त्री नेम्वाङ

हाम्रा कुरा

प्रकाशित २०७८ जेठ ३१ सोमबार

काठमाडौं । भौतिक पूर्वाधार तथा यातायात मन्त्री वसन्तकुमार नेम्बाङ्गले खुवालुङको विषयमा भ्रामक प्रचार भएको बताएका छन् ।

रेल विभाग, नेपाल रेलवे कम्पनी, नेपाल पानी जहाज कार्यालय र यातायात व्यवस्था विभागका प्रमुखहरुसँगको भर्चुअल बैठकमा उनले खुवालुङको विषयमा गलत प्रचार भइरहेको बताए ।

किराँती संस्कृति, सभ्यता र मुन्धुमसँग जोडिएको उक्त खुवालुङ ढुंगा सरकारले क्रेन लगाएर फुटाउन लागेको भन्दै केहि विरोधिहरु भ्रामक प्रचारमा लागेको उनले बताए । उनले भने, ‘प्रदेश सरकारले समेत उक्त खुवालुङ ढुंगा संरक्षणका लागि नीति तथा कार्यक्रममा राखेको छ । यो दायित्व पनि हो । सरकारका जनमुखि कामलाई विरोध गरेर राजनीति गर्न थालिएको छ । सरकारले खुवालुङको संरक्षण गर्छ, यो विषयमा कोहि कसैले राजनीति नगर्दा हुन्छ ।’

उनले नेपाल पानीजहाज कार्यालयलाई यस्तो साँस्कृतिक महत्व र जनभावनासंग जोडिएको विषयमा संवेदनसील भएर काम अगाडी बढाउन निर्देशन समेत दिए ।

‘खुवालुङको सन्दर्भका उठेको जनआवजलाई राम्रो ध्यान दिएका छौ । त्यहि भएर उपभोक्ता समिति बनेको छ । कार्यान्वय गर्ने निकायलाई समेत त्यहाँको साँस्कृतिक संवदेनशिलता र जनभावनालाई ध्यानदिन अनुरोध गर्दछु ।’ कार्यक्रममा भौतिक पूर्वाधार तथा यातायात मन्त्रालयका सचिव रविन्द्रनाथ श्रेष्ठले समेत धारणा राखेका थिए ।

भर्चुअल प्रगति समिक्षा गोष्ठीमा रेल विभागको महानिर्देशक प्रमिलादेवी बज्राचार्य, नेपाल रेल्वे कम्पनीका महाप्रबन्धक गुरु भट्टराई, नेपाल पानीजहाज कार्यालयका प्रमुख विपिन अधिकारी, यातायात व्यवस्था विभागका महानिर्देशक नमराज घिमिरले हालसम्मका आर्थिक, भौतिक प्रगति तथा बेरुजु फस्यौटको अवस्थाबारे प्रस्तुती राखेका थिए ।